PM receives warm welcome in Amman: اردن کے دو روزہ سرکاری دورے پر عَمان میں بھارتی برادری نے وزیراعظم نریندر مودی کا کیا پُرتپاک استقبال

عَمان: وزیراعظم نریندر مودی کو عمان پہنچنے پر بھارتی برادری کی جانب سے پُرجوش اور پُرتپاک استقبال کیا گیا۔ ہوٹل آمد کے موقع پر بڑی تعداد میں بھارتی شہری موجود تھے، جنہوں نے وزیراعظم کا خیرمقدم کرتے ہوئے بھارت اور اردن کے درمیان مضبوط عوامی روابط کا اظہار کیا۔

تین ملکی دورے کا پہلا مرحلہ

وزیراعظم مودی پیر کے روز اردن، ایتھوپیا اورعُمان کے تین ملکی دورے پر روانہ ہوئے ہیں۔ یہ دورہ بھارت کے ان ممالک کے ساتھ دوطرفہ تعلقات کو مزید مضبوط بنانے کی کوششوں کا حصہ ہے۔ اردن کا یہ دورہ چار روزہ غیر ملکی سفر کا پہلا مرحلہ ہے۔

اہم ملاقاتیں اور سفارتی گفتگو

اردن میں قیام کے دوران وزیراعظم نریندر مودی کی ملاقات شاہ عبداللہ دوم ابن الحسین اور وزیراعظم جعفر حسن سے طے ہے۔ یہ دورہ بھارت اور اردن کے درمیان سفارتی تعلقات کے قیام کے 75 برس مکمل ہونے کے موقع پر ہو رہا ہے، جسے دوطرفہ تعاون کے لیے ایک اہم سنگ میل قرار دیا جا رہا ہے۔

بھارتی برادری سے خصوصی ملاقات

وزیراعظم مودی نے اردن میں مقیم بھارتی برادری سے ملاقات کا بھی پروگرام رکھا ہے۔ انہوں نے کہا ہے کہ بیرون ملک مقیم بھارتی شہریوں نے بھارت۔اردن تعلقات کو مضبوط بنانے میں نمایاں کردار ادا کیا ہے۔

اُردن کے بعد ایتھوپیا کا دورہ

عَمان میں مصروفیات مکمل کرنے کے بعد وزیراعظم ایتھوپیا جائیں گے، جہاں وہ وزیراعظم ابی احمد علی سے ملاقات کریں گے، بھارتی برادری سے خطاب کریں گے اور ایتھوپیا کی پارلیمنٹ کے مشترکہ اجلاس سے خطاب کریں گے۔ اس حوالے سے وزیراعظم نے کہا کہ وہ ’’مدر آف ڈیموکریسی‘‘ کے طور پر بھارت کے سفر اورعالمی جنوبی ممالک کے لیے بھارت۔ایتھوپیا شراکت داری کی اہمیت پر اپنے خیالات پیش کریں گے۔

دورے کا آخری مرحلہ عُمان

تین ملکی دورے کے آخری مرحلے میں وزیراعظم نریندر مودی سلطنتِ عُمان کا دورہ کریں گے، جو سلطان ہیثم بن طارق کی دعوت پر ہورہا ہے۔ یہ ان کا عُمان کا دوسرا دورہ ہوگا اور اس موقع پر بھارت اور عمان کے سفارتی تعلقات کے 70 سال مکمل ہو رہے ہیں۔ عُمان میں وزیر اعظم عمان کے سلطان سے ملاقات کریں گے اور اسٹریٹجک شراکت داری کے ساتھ ساتھ تجارتی و اقتصادی تعلقات کو مزید مستحکم کرنے پر گفتگو کریں گے۔ وہ وہاں بھی بھارتی برادری سے خطاب کریں گے۔

تینوں ممالک سے تاریخی اور تہذیبی رشتے

روانگی سے قبل اپنے بیان میں وزیراعظم نے کہا تھا کہ بھارت کے اردن، ایتھوپیا اورعُمان کے ساتھ قدیم تہذیبی روابط اور مضبوط عصری دوطرفہ تعلقات موجود ہیں، جو اس دورے کی سفارتی اہمیت کو مزید بڑھاتے ہیں۔

بھارت ایکسپریس اردو۔