Dhurandhar Box Office Collection: ’دھرندھر‘ کا باکس آفس پر ڈبل دھماکہ! 10 دنوں میں عالمی کمائی 550 کروڑ سے تجاوز، ہر روز قائم کر رہی ہے نیا ریکارڈ

ممبئی: رنویر سنگھ کی فلم ’دھرندھر‘ نے باکس آفس پر شاندار کارکردگی کا مظاہرہ کرتے ہوئے ایک کے بعد ایک نیا ریکارڈ قائم کر دیا ہے۔ ریلیز کے محض 10 دنوں کے اندر فلم نے دنیا بھر میں 552.70 کروڑ روپے کا بزنس کر لیا ہے، جس کے بعد یہ فلم سال 2025 کی سب سے بڑی بلاک بسٹر فلموں میں شمار کی جا رہی ہے۔ فلم کی زبردست کمائی نے نہ صرف فلمی حلقوں بلکہ شائقین کو بھی حیران کر دیا ہے۔ آدتیہ دھر کی ہدایت کاری میں بننے والی ’دھرندھر‘ نے ریلیز کے پہلے ہی دن 28.60 کروڑ روپے کی مضبوط شروعات کی تھی۔ اس کے بعد فلم کی کمائی میں مسلسل اضافہ ہوتا رہا ہے۔ پہلے ہفتے میں فلم نے بھارتی باکس آفس پر 218 کروڑ روپے جمع کیے، جبکہ دوسرے ہفتے میں بھی فلم کی رفتار تھمتی نظر نہیں آئی۔ دوسرے ہفتے کے اختتام پر فلم نے غیر معمولی بزنس کیا، جس نے مجموعی کمائی کو نئی بلندیوں تک پہنچا دیا۔

فلم کے پروڈیوسرز کی جانب سے جاری کردہ اعداد و شمار کے مطابق، ’دھرندھر‘ نے 10 دنوں میں عالمی سطح پر 552.70 کروڑ روپے کا کلیکشن کیا ہے، جبکہ صرف بھارتی باکس آفس پر اس کی مجموعی کمائی 364.60 کروڑ روپے رہی ہے۔ خاص بات یہ ہے کہ دوسرے ہفتے کے ہفتہ کو فلم نے 53.70 کروڑ اور اتوار کو 58.20 کروڑ روپے کا بزنس کیا، جو اس کی مقبولیت کا واضح ثبوت ہے۔

مسلسل بڑھتی ہوئی کمائی کی بدولت ’دھرندھر‘ سال 2025 میں سب سے زیادہ کمائی کرنے والی ہندی فلموں کی فہرست میں تیسرے نمبر پر پہنچ گئی ہے۔ عالمی کمائی کے لحاظ سے اس سے آگے صرف ’سیارا‘ (579.23 کروڑ روپے) اور ’چھاوا‘ (797.34 کروڑ روپے) موجود ہیں۔ ماہرین کا ماننا ہے کہ اگر یہی رفتار برقرار رہی تو فلم جلد ہی مزید ریکارڈ توڑ سکتی ہے۔

’دھرندھر‘ ایک اسپائی تھرلر فلم ہے، جس کی کہانی بھارت میں پیش آنے والے حقیقی واقعات سے متاثر ہے۔ فلم میں کندھار ہائی جیک، پارلیمنٹ حملہ اور 26/11 ممبئی دہشت گرد حملوں جیسے حساس موضوعات کو ڈرامائی انداز میں پیش کیا گیا ہے۔ فلم میں رنویر سنگھ کے ساتھ اکشے کھنہ، آر مادھون، سنجے دت، ارجن رام پال، سارا ارجن اور راکیش بیدی نے اہم کردار ادا کیے ہیں، جن کی اداکاری کو خوب سراہا جا رہا ہے۔ فلم کے ٹریلر کی ریلیز کے ساتھ ہی شائقین میں زبردست جوش دیکھنے کو ملا تھا، جو سنیما گھروں میں بھی برقرار رہا۔ یہی جوش فلم کی ریکارڈ توڑ کمائی کی بڑی وجہ بنی۔ فلم کی غیر معمولی کامیابی کے بعد اس کے دوسرے حصے کا اعلان بھی کر دیا گیا ہے، جو 19 مارچ 2026 کو ریلیز ہوگا۔ پہلے حصے کی شاندار کامیابی نے ’دھرندھر پارٹ ٹو‘ سے ناظرین کی توقعات مزید بڑھا دی ہیں۔

بھارت ایکسپریس اردو