PM Modi paid tribute: وزیراعظم نریندر مودی نے تروولور کو پیش کیا خراج عقیدت، تروکرل پڑھنے کی اپیل

نئی دہلی: تمل ناڈو کی مقدس سرزمین کے عظیم فلسفی، شاعر اور مفکر سنت تروولور کو آج پورے ملک میں عقیدت کے ساتھ یاد کیا جا رہا ہے۔ تروولور دوس کے موقع پر وزیراعظم نریندر مودی نے انہیں دل سے خراج عقیدت پیش کیا اور ان کی تعلیمات کو آج کے دور کے لیے نہایت اہم قرار دیا۔

تروکرل غیر معمولی فکری صلاحیت کا ثبوت

وزیراعظم مودی نے سوشل میڈیا پلیٹ فارم ایکس پر ایک پیغام میں کہا کہ تروولور کے افکار اور تصانیف نے نسلوں کو متاثر کیا ہے۔ انہوں نے کہا کہ تروکرل عظیم تروولور کی غیر معمولی فکری صلاحیت کی عکاس ہے اور نوجوانوں کو چاہیے کہ وہ اس کا مطالعہ کریں تاکہ زندگی کی قدروں کو بہتر طور پر سمجھ سکیں۔

سماج میں ہم آہنگی اور رحم دلی کا پیغام

وزیراعظم نے اپنے پیغام میں لکھا: ’’آج تروولور دیوس پر ہمہ جہت شخصیت تروولور کو خراج عقیدت پیش کرتا ہوں، جن کے افکار بے شمار لوگوں کے لیے مشعل راہ ہیں۔ وہ سماج میں ہم آہنگی اور رحم دلی کے قائل تھے اور تمل ثقافت کی اعلیٰ قدروں کے نمائندہ تھے۔‘‘

مشکلات میں ثابت قدمی کی تلقین

اس موقع پر وزیراعظم مودی نے اپنے خطاب سے متعلق ایک ویڈیو بھی شیئر کی، جس میں انہوں نے سنت تروولور کا قول نقل کیا: ’’ناموافق حالات میں ہمیں کمزور نہیں پڑنا چاہیے، مشکلات سے بھاگنے کے بجائے مضبوط ارادے کے ساتھ اپنے مقصد کو حاصل کرنا چاہیے۔‘‘ انہوں نے کہا کہ تمل ناڈو عظیم سنت تروولور کی دھرتی ہے، جنہوں نے اپنی تحریروں کے ذریعے نوجوانوں کو نئی سمت دی اور آگے بڑھنے کی ترغیب دی۔

قوم اور فوج کے لیے تروولور کی تعلیمات

وزیراعظم مودی نے کہا کہ سنت تروولور نے صدیوں پہلے یہ واضح کیا تھا کہ شجاعت، عزت، باوقار طرز عمل اور اعتماد یہ چار اوصاف کسی بھی ملک کی فوج کی اصل پہچان ہوتے ہیں۔ تروولور دوس کے موقع پر بی جے پی کے رہنما کے انّاملائی نے بھی ایک پیغام میں کہا کہ تروولور نے تروکرل جیسی لازوال تصنیف دی، جو اخلاقیات، مادی زندگی اور انسانی خوشی کے اصول سکھاتی ہے۔ انہوں نے تمل ناڈو کے عوام کو مبارکباد دیتے ہوئے خواہش ظاہر کی کہ تروکرل کی روشنی پوری دنیا میں پھیلے۔

بھارت ایکسپریس اردو۔