PM Modi Condoles: قومی ایوارڈ یافتہ اداکار سلیم کمار کا انتقال، وزیراعظم نریندر مودی سمیت سیاسی و فلمی شخصیات کا اظہار تعزیت

نئی دہلی/کوچی: قومی ایوارڈ یافتہ معروف ملیالم اداکار سلیم کمار 56 برس کی عمر میں انتقال کر گئے، جس کے بعد کیرالہ سمیت پورے ملک میں غم کی لہر دوڑ گئی۔ سیاسی رہنماؤں، فلمی شخصیات اور مداحوں نے ان کے انتقال پر گہرے رنج و غم کا اظہار کیا ہے۔ وزیراعظم نریندر مودی نے سوشل میڈیا پلیٹ فارم ایکس پر تعزیتی پیغام جاری کرتے ہوئے کہا کہ سلیم کمار کے انتقال کی خبر سے انہیں گہرا صدمہ پہنچا ہے۔ انہوں نے کہا کہ اداکار نے اپنے طویل اور شاندار کیریئر کے دوران مختلف نوعیت کے کردار ادا کرکے اپنی منفرد شناخت قائم کی۔ وزیر اعظم نے مرحوم کے اہل خانہ اور مداحوں سے اظہارِ ہمدردی کرتے ہوئے ان کی روح کے لیے دعا کی۔

Deeply saddened by the passing of veteran actor Shri Salim Kumar Ji. Over the course of a distinguished career, he made a mark with his versatility and memorable performances across a wide range of roles. My thoughts are with his family and countless admirers in this hour of…

— Narendra Modi (@narendramodi) June 7, 2026

کیرالہ میں قائد حزب اختلاف پنارائی وجین نے بھی سلیم کمار کو خراجِ عقیدت پیش کیا۔ انہوں نے کہا کہ مِمکری آرٹسٹ کے طور پر اپنے سفر کا آغاز کرنے والے سلیم کمار نے غیر معمولی صلاحیت، ہمہ جہتی فن اور انتھک محنت کے ذریعے قومی ایوارڈ یافتہ اداکار کا مقام حاصل کیا۔ ان کے مطابق سلیم کمار کی یادگار اداکاری آنے والی نسلوں کو متاثر کرتی رہے گی۔

Deeply saddened by the passing of veteran actor Salim Kumar. From his early days as a mimicry artist to becoming a National Award-winning actor, he carved a unique place in cinema through his extraordinary talent, versatility, and dedication to his craft. His unforgettable… pic.twitter.com/1G8gue7QkW

— Pinarayi Vijayan (@pinarayivijayan) June 7, 2026

’ملیالم سنیما نے ایک لیجنڈ کھو دیا‘

کیرالہ کے وزیراعلیٰ وی ڈی ستیسن نے سلیم کمار کو نہ صرف عظیم فنکار بلکہ اپنا قریبی دوست قرار دیتے ہوئے کہا کہ وہ ایک ایسے باصلاحیت اداکار تھے جو ایک ہی چہرے سے لوگوں کو ہنسا بھی سکتے تھے اور رُلا بھی سکتے تھے۔ انہوں نے کہا کہ ملیالم سنیما ایک لیجنڈ سے محروم ہو گیا ہے جبکہ انہوں نے اپنا ایک بھائی کھو دیا ہے۔

He wasn’t just the prince of laughter to me — #SalimKumar was a deeply connected soul, fearless in his political beliefs and proud to say he stood with Congress. A versatile genius who could make us laugh and cry with the same face. Malayalam cinema lost a legend, and I lost a… pic.twitter.com/H0tx6RulC6

— V D Satheesan (@vdsatheesan) June 6, 2026

اداکارہ نوویا نائر نے اے این آئی سے گفتگو کرتے ہوئے کہا کہ سلیم کمار ایک نہایت خوش مزاج، محبت کرنے والے اور فیاض انسان تھے۔ انہوں نے یاد کرتے ہوئے کہا کہ شوٹنگ کے دوران اکثر ان کے ساتھ سفر ہوتا تھا اور ان کی صحبت ہر شخص کے چہرے پر مسکراہٹ لے آتی تھی۔ اداکار جین چیرتھالا نے بتایا کہ سلیم کمار گزشتہ تین سے چار برسوں سے بعض اندرونی اعضا سے متعلق بیماریوں میں مبتلا تھے۔ انہوں نے کہا کہ فلمی دنیا کی تمام اہم شخصیات انہیں خراجِ عقیدت پیش کرنے کے لیے موجود ہیں۔

تین دہائیوں پر محیط فلمی سفر

کانگریس رکن پارلیمنٹ کوڈی کُنل سریش نے بھی سلیم کمار کے انتقال پر افسوس کا اظہار کرتے ہوئے کہا کہ وہ ملیالم فلم انڈسٹری کے اہم ترین فنکاروں میں شمار ہوتے تھے۔ سلیم کمار نے تین دہائیوں سے زائد عرصے پر محیط اپنے فلمی کیریئر میں 300 سے زیادہ فلموں میں اداکاری کی۔ ابتدا میں وہ مزاحیہ کرداروں کی وجہ سے مقبول ہوئے، لیکن بعد ازاں سنجیدہ اور جذباتی کرداروں میں بھی اپنی غیر معمولی صلاحیتوں کا لوہا منوایا۔

سرکاری اعزاز کے ساتھ آخری رسومات

کیرالہ حکومت کے مطابق سلیم کمار کو ہفتہ کے روز طبیعت بگڑنے پر کوچی کے اسپتال منتقل کیا گیا تھا، جہاں وہ انتقال کر گئے۔ ان کی میت کو عوامی دیدار کے لیے پاراور ٹاؤن ہال میں رکھا گیا، جبکہ آج ان کی رہائش گاہ شمالی پاراور، ضلع ارناکولم میں سرکاری اعزاز کے ساتھ آخری رسومات ادا کی جائیں گی۔ سلیم کمار اپنے پسماندگان میں اہلیہ سنیتا اور دو بیٹوں، چندو سلیم کمار اور آرومال سلیم کمار کو سوگوار چھوڑ گئے ہیں۔ ان کے انتقال سے ملیالم فلم انڈسٹری ایک ایسے فنکار سے محروم ہو گئی ہے جس نے مزاح اور سنجیدہ اداکاری دونوں میدانوں میں ناقابلِ فراموش نقوش چھوڑے۔

بھارت ایکسپریس اردو۔