نئی دہلی : مرکزی وزیر داخلہ امت شاہ نے کہا کہ وزیر اعظم نریندر مودی کی قیادت میں سرحدی دیہات کو ملک کے آخری گاؤں کے بجائے پہلا گاؤں قرار دے کر ان کی ترقی پر خصوصی توجہ دی جارہی ہے۔ فوج اور آئی ٹی بی پی کے تعاون سے مقامی معیشت کو مضبوط بنانے کے ساتھ ڈیری، امدادی گروپوں اور کوآپریٹو تحریک کے ذریعے اروناچل پردیش کو خود کفیل بنانے کی کوششیں بھی تیز کی جارہی ہیں۔ چین کی سرحد سے متصل اروناچل پردیش کے سرحدی علاقوں میں ترقیاتی سرگرمیوں کے مثبت نتائج سامنے آنے لگے ہیں۔ مرکزی وزیر داخلہ امت شاہ نے اتوار کو ایٹانگر میں 5610 کروڑ روپے سے زیادہ کی لاگت کے چار بڑے ترقیاتی منصوبوں کا آغاز کرتے ہوئے کہا کہ مرکز کے ’وائبریٹ ولیجز پروگرام‘ (وی وی پی) کے تحت بنیادی سہولیات کی فراہمی کے بعد چین کی سرحد سے متصل 40 گاؤں کے لوگ اب اپنے گھروں کو واپس لوٹ رہے ہیں۔اس موقع پر وزیر اعلیٰ پیما کھانڈو اور مرکزی وزیر کرن رجیجو بھی موجود تھے۔ امت شاہ نے کہا کہ سرحدی علاقوں میں بنیادی سہولیات کی ترقی، نقل مکانی روکنے اور مقامی لوگوں کی زندگی بہتر بنانے کے لیے حکومت مسلسل کام کررہی ہے۔ انہوں نے فوج اور انڈو تبت بارڈر پولیس (آئی ٹی بی پی) کے تعاون، ڈیری اور کوآپریٹو تحریک کے فروغ اور خواتین کے سیلف ہیلپ گروپس کے ذریعے سرحدی و دیہی علاقوں کو خود کفیل بنانے کا منصوبہ بھی پیش کیا۔
سرحدی دیہات کو 5610 کروڑ روپے کے ترقیاتی منصوبوں کی سوغات
امت شاہ نے بتایا کہ وزیر اعظم نریندر مودی کی قیادت میں مرکزی حکومت نے سرحدی دیہات کو ملک کے پہلے گاؤں کا درجہ دے کر وہاں صحت، بجلی، تعلیم اور پینے کے پانی جیسی بنیادی سہولیات کی فراہمی کو ترجیح دی ہے۔شروع کیے گئے ترقیاتی منصوبوں میں ’مشن شکشت اروناچل‘ کا دوسرا مرحلہ، بجلی کی ترقی سے متعلق منصوبہ، دیہی سڑکوں کی تعمیر اور وائبریٹ ولیجز پروگرام کے تحت 11 سرحدی اضلاع میں 199 منصوبے شامل ہیں۔ ان منصوبوں کا بنیادی مقصد سرحدی علاقوں سے لوگوں کی نقل مکانی روکنا، بنیادی ڈھانچے کو مضبوط بنانا اور مقامی باشندوں کے معیار زندگی کو بہتر بنانا ہے۔
فوج اور آئی ٹی بی پی کی مدد سے مضبوط ہوگی دیہی معیشت
مرکزی وزیر داخلہ نے کہا کہ ہندوستانی فوج اور انڈو تبت بارڈر پولیس کے جوان سرحدی دیہات کے کسانوں کی پیداوار بڑھانے اور مقامی مصنوعات کی مارکیٹنگ میں مدد کررہے ہیں۔انہوں نے کہا کہ فوجی جوان جب مقامی فصلوں اور غذائی اشیا کا استعمال کرتے ہیں تو اس سے دیہی باشندوں کے ساتھ ان کا جذباتی تعلق بھی مضبوط ہوتا ہے۔ اس طرح سرحدی علاقوں میں معاشی سرگرمیوں کو فروغ دینے کے ساتھ مقامی لوگوں اور سیکورٹی فورسز کے درمیان اعتماد اور قربت میں بھی اضافہ ہورہا ہے۔امت شاہ نے یہ بھی کہا کہ اروناچل پردیش کی ہمہ جہت ترقی کے لیے مرکزی حکومت اب پہلے کے مقابلے چار گنا سے زیادہ مالی وسائل فراہم کررہی ہے۔
ڈیری اور کوآپریٹو تحریک سے خود کفیل بنے گا اروناچل پردیش
امت شاہ نے ریاست کو خود کفیل بنانے میں کوآپریٹو تحریک اور خواتین کے سیلف ہیلپ گروپس کے کردار پر بھی زور دیا۔ انہوں نے کہا کہ دودھ، انڈے، مچھلی اور گوشت کی پیداوار میں اضافہ کرکے اروناچل پردیش کو ان شعبوں میں خود کفیل بنایا جاسکتا ہے۔انہوں نے یقین دہانی کرائی کہ اگر ریاست میں دودھ کی پیداوار میں خاطر خواہ اضافہ ہوتا ہے تو نیشنل ڈیری ڈیولپمنٹ بورڈ (این ڈی ڈی بی) اور امول دودھ کی خریداری کریں گے۔ اس سلسلے میں جلد ہی این ڈی ڈی بی کی ایک ٹیم اروناچل پردیش بھیجی جائے گی۔دورجی کھانڈو اسٹیٹ کنونشن سینٹر میں منعقدہ اس پروگرام کے دوران امت شاہ نے ’اروناچل پردیش کوآپریشن وژن ڈاکیومنٹ 2047‘ کی رونمائی کی۔ اس کے علاوہ انہوں نے کوآپریشن ایوارڈز تقسیم کیے، ’سرس میلے‘ کا افتتاح کیا اور موبائل میڈیکل وین کو ہری جھنڈی دکھا کر روانہ کیا۔حکومت کا کہنا ہے کہ ان اقدامات کے ذریعے سرحدی علاقوں میں بنیادی سہولیات، روزگار اور مقامی معیشت کو فروغ دے کر نہ صرف لوگوں کی نقل مکانی روکی جائے گی بلکہ ان علاقوں کو ترقی کے قومی دھارے سے بھی مضبوطی سے جوڑا جائے گا۔
بھارت ایکسپریس اردو
سونے کی قیمتوں میں گراوٹ کے بعد وزیر اعظم کے پرانے مشورے کی تعریف، لاکھوں…
ایس جے شنکر اور بلغاریہ کی وزیر خارجہ کے درمیان اہم مذاکرات۔ بھارت اور بلغاریہ…
اس کتاب کو خاص طور پر دلچسپ بنانے والی چیز اس تبدیلی کے پیچھے کارفرما…
وزیراعظم مودی نے نو افراد کی موت پر اظہارِافسوس کرتے ہوئے کہا ہے کہ حادثے…
ہندوستان کے سابق جارحانہ اوپننگ بلے باز وریندر سہواگ اپنے ٹیسٹ کیریئر میں مجموعی طور…
مرکزی وزیر داخلہ نے گزشتہ روز اروناچل پردیش میں امن و امان، داخلی سلامتی اور…