SCO Summit 2025: پی ایم مودی نے کرغزستان اور ازبکستان کے صدور سے کی ملاقات، دو طرفہ تعلقات پر کیا تبادلہ خیال

تیانجن: وزیر اعظم نریندر مودی نے اتوار کے روز چین کے شہر تیانجن میں شنگھائی تعاون تنظیم (ایس سی او) کے سربراہی اجلاس کے موقع پر کرغزستان کے صدر صدیر جاپاروف اور ازبکستان کے صدر شوکت مرزیوئف سے ملاقات کی۔ اس دوران انہوں نے دوطرفہ تعلقات کو مزید گہرا کرنے پر تبادلہ خیال کیا۔

پی ایم مودی نے سوشل میڈیا پلیٹ فارم X پر دونوں لیڈران کے ساتھ ملاقات کی تصاویر شیئر کیں۔ انہوں نے لکھا، ’’تیانجن میں کرغزستان کے صدر صدیر جاپاروف کے ساتھ بہت مفید بات چیت ہوئی۔ ہمارے ممالک کے درمیان مضبوط شراکت داری ہے اور ہم اپنے ترقیاتی تعاون کو مزید مضبوط بنانے کے لیے مل کر کام کرتے رہیں گے۔‘‘

ازبکستان کے صدر کے ساتھ اپنی ملاقات کی تصویر شیئر کرتے ہوئے، انہوں نے ایکس پر لکھا، ’’ازبکستان کے صدر شوکت مرزیوئف سے ملاقات کی۔ ہندوستان اور ازبکستان کے درمیان ایک متحرک شراکت داری ہے جو ثقافت، معیشت اور عوام کے درمیان تعلقات میں مسلسل پھیل رہی ہے۔‘‘

اس سے پہلے پی ایم مودی نے تیانجن میں شنگھائی تعاون تنظیم کے سربراہی اجلاس کے دوران مالدیپ کے صدر محمد معزو سے بات کی تھی۔ انہوں نے کہا کہ مالدیپ کے ساتھ ہندوستان کا ترقیاتی تعاون ہمارے لوگوں کے لئے انتہائی فائدہ مند ہے۔

ایک اور پوسٹ میں پی ایم مودی نے مصری وزیر اعظم سے اپنی ملاقات کے بارے میں جانکاری دی تھی۔ انہوں نے کہا، ’’ایس سی او سربراہی اجلاس میں مصری وزیر اعظم مصطفیٰ مدبولی سے ملاقات کی۔ چند سال پہلے میرے مصر کے دورے کو یاد کیا۔ ہند-مصر دوستی ترقی کی نئی بلندیوں کو چھو رہی ہے۔‘‘

اس کے علاوہ پی ایم مودی نے اتوار کے روز شنگھائی تعاون تنظیم کے سربراہی اجلاس کے موقع پر تیانجن میں چینی صدر شی جن پنگ کے ساتھ ملاقات کی۔ وزیر اعظم مودی نے کہا کہ دونوں فریقوں نے سرحدی علاقوں میں امن اور استحکام کو برقرار رکھنے کی اہمیت پر اتفاق کیا۔

پی ایم مودی نے ایکس پر تصویر شیئر کرتے ہوئے لکھا، ’’تیانجن میں صدر شی جن پنگ کے ساتھ شنگھائی تعاون تنظیم کے سربراہی اجلاس کے موقع پر ایک نتیجہ خیز ملاقات ہوئی۔ ہم نے کازان میں ہونے والی پچھلی میٹنگ کے بعد سے ہندوستان اور چین کے تعلقات میں مثبت پیش رفت کا جائزہ لیا۔ ہم نے سرحدی علاقوں میں امن اور استحکام کو برقرار رکھنے کی اہمیت پر اتفاق کیا اور باہمی احترام، مفاد اور حساسیت کی بنیاد پر تعاون کے اپنے عزم کا اعادہ کیا۔‘‘

بھارت ایکسپریس۔