PM Modi heads to Japan for two-day trip: وزیراعظم نریندر مودی جاپان کے دو روزہ دورے کے لیے دہلی سے روانہ، تعلقات کو مستحکم کرنے پر ہوگا زور

وزیراعظم نریندر مودی جمعرات کی شام جاپان کے وزیراعظم شیگیرو ایشیبا کی دعوت پر دو روزہ دورے پر جاپان روانہ ہوئے، جہاں وہ 15ویں سالانہ سربراہی اجلاس میں شرکت کریں گے۔ اس دورے کا مقصد بھارت اور جاپان کے درمیان ’’خصوصی اسٹریٹجک اور عالمی شراکت داری‘‘ کو نئی سمت دینا اور دو طرفہ تعلقات کو مزید مستحکم کرنا ہے۔

روانگی سے قبل اپنے پیغام میں وزیراعظم مودی نے کہا کہ ’’اس دورے کے دوران ہم اپنی خصوصی اسٹریٹجک اور عالمی شراکت داری کے اگلے مرحلے کو شکل دینے پر توجہ مرکوز کریں گے، جس نے گزشتہ گیارہ برسوں میں مسلسل اور اہم پیش رفت کی ہے۔ ہم اپنے تعاون کو نئی بلندیوں تک لے جانے، اقتصادی اور سرمایہ کاری کے تعلقات کے دائرہ کار کو وسعت دینے اور مصنوعی ذہانت و سیمی کنڈکٹرز سمیت نئی اور ابھرتی ہوئی ٹیکنالوجیز میں اشتراک کو فروغ دینے کی کوشش کریں گے۔‘‘ وزیراعظم مودی نے مزید کہا کہ جاپان کا دورہ تہذیبی و ثقافتی رشتوں کو مزید مضبوط کرنے کا موقع بھی فراہم کرے گا، جو دونوں اقوام کے عوام کو جوڑتے ہیں۔

جاپان کے بعد وزیراعظم چین کے شہر تیانجن روانہ ہوں گے، جہاں وہ چینی صدر شی جن پنگ کی دعوت پر شنگھائی تعاون تنظیم (SCO) کے سربراہی اجلاس میں شرکت کریں گے۔ بھارت SCO کا فعال اور تعمیری رکن ہے اور اپنی صدارت کے دوران بھارت نے اختراعات، صحت اور ثقافتی تبادلوں کے شعبوں میں کئی نئی پہلیں کی ہیں۔ اس حوالے سے اپنے پیغام میں وزیراعظم نے کہا کہ ’’بھارت SCO کے رکن ممالک کے ساتھ مل کر مشترکہ چیلنجز سے نمٹنے اور علاقائی تعاون کو گہرا کرنے کے لیے پُرعزم ہے۔ میں صدر شی جن پنگ، صدر پوتن اور دیگر رہنماؤں سے ملاقات کا منتظر ہوں۔‘‘ وزیراعظم مودی نے اس یقین کا بھی اظہار کیا کہ ان کا جاپان اور چین کا دورہ نہ صرف قومی مفادات کو فروغ دے گا بلکہ علاقائی اور عالمی امن، سلامتی اور پائیدار ترقی کے لیے بھی مفید ثابت ہوگا۔

بھارت ایکسپریس اردو