G-7 Summit: جی-7 سربراہ اجلاس میں وزیراعظم مودی کی عالمی رہنماؤں کے ساتھ روایتی گروپ فوٹو میں شرکت، اہم دوطرفہ ملاقاتیں بھی متوقع

ایویان (فرانس): وزیراعظم نریندر مودی منگل کو فرانس کے خوبصورت سیاحتی شہر ایویان-لے-بینز میں منعقدہ 52ویں جی-7 سربراہ اجلاس کے دوران عالمی رہنماؤں کے ساتھ روایتی گروپ فوٹو سیشن میں شریک ہوئے۔ اس موقع پر دنیا کی بڑی معیشتوں اور اہم شراکت دار ممالک کے سربراہان ایک ساتھ نظر آئے۔ گروپ فوٹو میں وزیراعظم نریندر مودی کے ساتھ یورپی کونسل کے صدر انتونیو کوسٹا، اٹلی کی وزیراعظم جارجیا میلونی، مصر کے صدر عبدالفتاح السیسی، امریکی صدر ڈونلڈ ٹرمپ، فرانس کے صدر ایمانوئل میکروں، جرمنی کے چانسلر فریڈرک مرز، برطانیہ کے وزیراعظم کیر اسٹارمر، کینیڈا کے وزیراعظم مارک کارنی، جاپان کی وزیراعظم سنائے تاکائیچی، یورپی کمیشن کی صدر اُرسولا وان دیر لیئن اور برازیل کے صدر لوئیز اناسیو لولا دا سلوا بھی موجود تھے۔

ایمانوئل میکروں نے کیا خیرمقدم

روایتی گروپ فوٹو سے قبل فرانس کے صدر ایمانوئل میکرون نے جی-7 اجلاس کے مقام پر وزیراعظم نریندر مودی کا پرتپاک استقبال کیا۔ وزیراعظم مودی فرانسیسی صدر کی خصوصی دعوت پر اس اہم عالمی اجلاس میں شرکت کے لیے فرانس پہنچے ہیں۔ بھارت اس مرتبہ 13ویں بار شراکت دار ملک کے طور پر جی-7 اجلاس میں شرکت کر رہا ہے، جبکہ وزیراعظم مودی مسلسل ساتویں مرتبہ اس عالمی فورم کا حصہ بنے ہیں، جو عالمی سطح پر بھارت کے بڑھتے ہوئے اثر و رسوخ کی عکاسی کرتا ہے۔

جنیوا میں سوئس صدر سے ملاقات

فرانس روانگی سے قبل وزیراعظم مودی نے سوئٹزرلینڈ کے شہر جنیوا میں مختصر قیام کیا، جہاں انہوں نے سوئس کنفیڈریشن کے صدر گائے پارمیلین سے ملاقات کی۔ اس دوران دونوں رہنماؤں نے باہمی تعلقات کو مزید مستحکم بنانے اور مختلف شعبوں میں تعاون بڑھانے کے امکانات پر تبادلہ خیال کیا۔ بھارتی وزارت خارجہ کے ترجمان رندھیر جیسوال کے مطابق ملاقات خوشگوار ماحول میں ہوئی اور دونوں ممالک نے دوطرفہ شراکت داری کو مزید وسعت دینے کے عزم کا اظہار کیا۔

بین الاقوامی تعاون اور ترقی پر ہوگی گفتگو

جی-7 اجلاس کے دوران وزیر اعظم نریندر مودی ’’نئی شراکت داریوں کی تشکیل اور بین الاقوامی یکجہتی کی ازسرنو تعمیر‘‘ کے عنوان سے منعقد ہونے والے اہم ورکنگ سیشن میں شرکت کریں گے۔ اس اجلاس میں جی-7 ممالک کے علاوہ شراکت دار ممالک اور عالمی مالیاتی اداروں کے سربراہان بھی شریک ہوں گے۔ توقع ہے کہ اجلاس میں عالمی تعاون، پائیدار ترقی، معاشی استحکام، سرمایہ کاری اور دنیا کو درپیش بڑے اقتصادی چیلنجوں پر تفصیلی گفتگو کی جائے گی۔

اہم دوطرفہ ملاقاتیں بھی متوقع

جی-7 اجلاس کے موقع پر وزیراعظم مودی کی متعدد اہم دوطرفہ ملاقاتیں بھی طے ہیں۔ ان میں کینیڈا کے وزیراعظم مارک کارنی، برطانیہ کے وزیر اعظم کیر اسٹارمر اور متحدہ عرب امارات کے صدر شیخ محمد بن زاید النہیان کے ساتھ ملاقاتیں شامل ہیں۔ اس کے علاوہ 17 جون کو امریکی صدر ڈونالڈ ٹرمپ کے ساتھ بھی اہم ملاقات متوقع ہے۔ وائٹ ہاؤس کے مطابق اس ملاقات میں مجوزہ بھارت-امریکہ تجارتی معاہدے سمیت مختلف دوطرفہ اور عالمی امور پر تبادلہ خیال کیا جائے گا۔

سلوواکیہ کے تاریخی دورے کے بعد فرانس پہنچے مودی

فرانس پہنچنے سے قبل وزیراعظم نریندر مودی نے سلوواکیہ کا تاریخی دورہ مکمل کیا، جو 1993 میں سلوواکیہ کی آزادی کے بعد کسی بھارتی وزیر اعظم کا پہلا دورہ تھا۔ اس دورے کے دوران سلوواکیہ کے وزیر اعظم رابرٹ فیکو اور صدر پیٹر پیلیگرینی کے ساتھ اہم ملاقاتیں ہوئیں۔ دونوں ممالک نے اپنے تعلقات کو جامع شراکت داری کی سطح تک بلند کرنے پر اتفاق کیا اور تجارت، دفاع، ٹیکنالوجی، تعلیم، اختراع اور عوامی روابط کے شعبوں میں تعاون بڑھانے کے لیے متعدد معاہدوں پر دستخط کیے۔ وزیراعظم مودی نے سلوواکیہ کے دورے کو ’’تاریخی اور نتیجہ خیز‘‘ قرار دیتے ہوئے کہا کہ اس کے نتائج دونوں ممالک کے تعلقات کو نئی بلندیوں تک پہنچانے میں مددگار ثابت ہوں گے۔

بھارت ایکسپریس اردو۔