Bihar Politics: بہار کو پی ایم مودی صرف ’سوغات‘ ہی دے رہے ہیں، اب تک کوئی ٹھوس ’ترقی‘ نہیں دے پائے ہیں: کانگریس کے بہار انچارج کرشنا الاوارو

پٹنہ: کانگریس کے بہار انچارج کرشنا الاوارو نے وزیر اعظم نریندر مودی کی بہار آمد پر کہا کہ پی ایم مودی بہار کو صرف ’سوغات‘ دے رہے ہیں لیکن اب تک کوئی ٹھوس ترقی نہیں دے پائے ہیں۔

انہوں نے کہا کہ بہار میں ابھی تک کوئی ٹھوس نتیجہ نہیں ملا ہے۔ انہوں نے وزیر اعظم مودی اور وزیر اعلیٰ نتیش کمار سے کہا کہ وہ بہار اور بہار کے لوگوں کو بتائیں کہ انہوں نے گزشتہ 11 سالوں میں عام لوگوں، عام خواتین، عام نوجوانوں اور عام کسانوں کے لیے کیا کیا ہے؟ اس کے بعد ہم آگے بات کریں گے۔

ہندوستان کی چوتھی بڑی معیشت بننے اور جاپان کو پیچھے چھوڑنے پر بہار کانگریس کے انچارج کرشنا الاوارو نے کہا کہ بہار کی کیا صورتحال ہے، اس کے بارے میں وزیر اعظم بتائیں۔ بہار آج ہندوستان کی ریاستوں میں روزگار، بیوروکریسی اور کرپشن کے معاملے میں کہاں کھڑا ہے؟ ان تمام معاملات پر وزیراعظم کو کھل کر بتانا چاہیے کہ ہم کہاں ہیں۔ وزیر اعظم کو بتانا چاہئے کہ ان کے 11 سالوں میں بڑی ریاستوں میں بہار 27-28 ویں نمبر پر ہے۔ بہت سارے پیرامیٹرز پر بہار دیگر ریاستوں سے بہت پیچھے ہے۔

چیف منسٹر نتیش کمار کے ہفتہ کو دہلی میں نیتی آیوگ میٹنگ میں شرکت نہ کرنے پر انہوں نے کہا کہ اگر نیتی آیوگ کی میٹنگ میں بیٹھ کر بہار کی ترقی ہوسکتی ہے تو آج ہندوستان جاپان سے نہیں بلکہ امریکہ سے آگے ہوتا۔ اصل مسئلہ یہ ہے کہ وزیر اعظم، وزیر اعلیٰ اور یہاں کی نوکر شاہی (سپر سی ایم) تینوں مل کر خود کے لوگوں کی ترقی کی بات کرتے ہیں، لیکن بہار کے لوگوں کی ترقی کی بات نہیں کرتے۔

راہل گاندھی کی قیادت میں عظیم اتحاد کے الیکشن لڑنے کے بارے میں آزاد رکن پارلیمنٹ پپو یادو کے بیان پر بہار کانگریس انچارج نے کہا کہ بہار میں عظیم اتحاد مل کر الیکشن لڑے گا۔ ہمارے ہر لیڈر کے لیے عوام کے دلوں میں جگہ ہے اور ہم عوام کے درمیان مضبوطی سے الیکشن لڑیں گے۔ عوامی مدعوں پر الیکشن لڑیں گے۔

بھارت ایکسپریس۔