PM Modi given a ’21-gun salute’ in Maldives: مالدیپ میں پی ایم مودی کو دی گئی ’’اکیس توپوں کی سلامی‘‘، صدر معیزو نے کیا استقبال

وزیر اعظم نریندر مودی کا جمعہ کو مالے کے ریپبلک اسکوائر پر رسمی استقبال کیا گیا۔ مالدیپ کے صدر محمد معیزو پی ایم مودی کے ساتھ اس مقام پر پہنچے جہاں ہندوستان اور مالدیپ دونوں ممالک کے قومی ترانے بجائے گئے۔ اس دوران پی ایم مودی کو رسمی استقبال کے طور پر 21 توپوں کی سلامی دی گئی۔

پی ایم مودی نے ریپبلک اسکوائر پر مالدیپ کی کابینہ کے وزراء اور عہدیداروں سے ملاقات کی۔ دریں اثناء مالدیپ کے دارالحکومت میں وزارت دفاع کی عمارت نے پی ایم مودی کی ایک بڑی تصویر آویزاں کی۔ وہیں آج پی ایم مودی نے اپنی ایک سوشل میڈیا پوسٹ میں کہا کہ دونوں ممالک کے درمیان مضبوط تعلقات سے لوگوں کو بہت فائدہ ہوگا۔

سوشل میڈیا پلیٹ فارم ’ایکس‘ پر ایک پوسٹ میں پی ایم مودی نے لکھا کہ ’’مالے میں اترا۔ صدر معیزو کا میرے استقبال کے لیے ہوائی اڈے پر آنا متاثرکن تھا۔ مجھے یقین ہے کہ ہندوستان-مالدیپ کی دوستی آنے والے وقت میں ترقی کی نئی بلندیوں کو چھوئے گی۔‘‘ واضح رہے کہ پی ایم مودی صدر معیزو کی دعوت پر ہی مالدیپ کا دورہ کر رہے ہیں، جہاں وہ ملک کے 60ویں یوم آزادی کی تقریبات میں بطور مہمان خصوصی شرکت کریں گے۔ وزارت خارجہ کے سرکاری ترجمان رندھیر جیسوال نے کہا کہ پی ایم مودی مالدیپ کی آزادی کی 60ویں سالگرہ کے موقع پر ’’گیسٹ آف آنر‘‘ کے طور پر شرکت کریں گے۔

بھارت ایکسپریس اردو