PM Modi Guru Purnima Greetings 2026: گرو صرف علم ہی نہیں، اعلیٰ اقدار بھی سکھاتے ہیں، گرو پورنیما پر وزیر اعظم مودی کی ملک بھر کو مبارکباد

نئی دہلی : آشاڑھ ماہ کی مقدس پورنیما کے موقع پر منائے جانے والے گرو پورنیما کے تہوار پر وزیر اعظم نریندر مودی نے ملک بھر کے عوام کو دل کی گہرائیوں سے مبارکباد اور نیک خواہشات پیش کی ہیں۔ انہوں نے بھارت کی عظیم گرو-ششیہ (استاد و شاگرد) روایت کی اہمیت کو اجاگر کرتے ہوئے کہا کہ گرو صرف کتابی علم نہیں دیتے بلکہ اپنے شاگردوں کی شخصیت سازی کرتے ہیں، ان کے اندر مثبت سوچ پیدا کرتے ہیں اور انہیں اعلیٰ اخلاق، اچھے خیالات اور بہترین اقدار سے آراستہ کرتے ہیں۔وزیر اعظم  مودی نے اپنے پیغام میں کہا کہ گرو پورنیما کا یہ مقدس موقع ہمیں اپنے اساتذہ کے احترام اور ان کی تعلیمات کو زندگی میں اپنانے کی ترغیب دیتا ہے۔ انہوں نے عوام سے اپیل کی کہ وہ اپنے گروؤں کے نظریات اور تعلیمات کو اپنی زندگی کا حقیقی سہارا بنائیں، کیونکہ یہی تعلیمات انسان کو کامیابی، خدمت اور کردار کی بلندی کی راہ دکھاتی ہیں۔

وزیر اعظم  مودی نے سنسکرت کا معروف شلوک بھی شیئر کیا

گرو پورنیما کے موقع پر وزیر اعظم نریندر مودی نے اپنے پیغام کے ساتھ ایک قدیم اور معنی خیز سنسکرت شلوک بھی شیئر کیا: “प्रेरकः सूचकश्चैव वाचको दर्शकस्तथा। शिक्षकः बोधकश्चैव षडेते गुरवः स्मृताः॥“

اس شلوک کے ذریعے وزیر اعظم  مودی نے گرو کی چھ مختلف اور مقدس حیثیتوں کو بیان کیا۔ اس کی تشریح کرتے ہوئے بتایا گیا کہ زندگی میں ترغیب دینے والا (پریرک)، صحیح راستہ دکھانے والا (سوچک)، علم کی بات کرنے والا (واچک)، سچائی کی راہ دکھانے والا (درشک)، تعلیم دینے والا (شکشک) اور اعلیٰ معرفت کا شعور عطا کرنے والا (بودھک)، یہ سب ایک گرو کے مختلف اور قابلِ احترام روپ ہیں۔

بھارتی تہذیب اور اخلاقی اقدار کو فروغ دینے کی کوشش

وزیراعظم مودی نے اپنے خصوصی ویڈیو پیغام میں اس شلوک کے ہر پہلو کی تفصیل سے وضاحت بھی کی۔ ویڈیو میں بتایا گیا کہ ایک حقیقی گرو صرف تعلیم دینے والا نہیں ہوتا بلکہ وہ شاگرد کے کردار، سوچ اور شخصیت کی تعمیر میں بنیادی کردار ادا کرتا ہے۔ یہی مضبوط کردار آگے چل کر قوم کی تعمیر اور معاشرے کی ترقی کی بنیاد بنتا ہے۔وزیر اعظم مودی  کا کہنا تھا کہ بھارت کی قدیم علمی روایت آج بھی اتنی ہی اہم ہے جتنی صدیوں پہلے تھی۔ اس روایت نے دنیا کو علم، اخلاق اور روحانی اقدار کا پیغام دیا ہے۔ انہوں نے اس بات پر زور دیا کہ موجودہ دور میں بھی اساتذہ کی رہنمائی نوجوان نسل کو صحیح سمت دینے کے لیے نہایت ضروری ہے۔وزیر اعظم مودی کی جانب سے گرو پورنیما پر جاری کیا گیا یہ خصوصی پیغام ان کی اس مسلسل کوشش کا حصہ ہے، جس کے ذریعے وہ بھارتی تہذیب، سناتن روایات، اخلاقی اقدار اور قدیم علمی ورثے کو جدید دور کے تناظر میں نئی نسل تک پہنچانے کی کوشش کر رہے ہیں۔ انہوں نے کہا کہ ایک بہترین گرو نہ صرف ایک کامیاب فرد تیار کرتا ہے بلکہ ایک مضبوط، باکردار اور ترقی یافتہ قوم کی بنیاد بھی رکھتا ہے۔

بھارت ایکسپریس اردو