Commonwealth Games 2026: قوم کو آپ پر فخر ہے، صدر دروپدی مرمو کی گل ویر سنگھ کو تاریخی سلور میڈل جیتنے پر مبارکباد

نئی دہلی :کامن ویلتھ گیمز 2026 میں بھارت کی شاندار کارکردگی کا سلسلہ چھٹے روز بھی جاری رہا۔ مردوں کی 10 ہزار میٹر دوڑ میں بھارتی ایتھلیٹ گل ویر سنگھ نے شاندار کارکردگی کا مظاہرہ کرتے ہوئے سلو ر میڈل اپنے نام کیا۔ وہ کامن ویلتھ گیمز کی مردوں کی 10 ہزار میٹر دوڑ میں بھارت کے لیے تمغہ جیتنے والے پہلے ایتھلیٹ بن گئے، جس پر صدر جمہوریہ دروپدی مرمو سمیت کئی اہم شخصیات نے انہیں مبارکباد پیش کی ہے۔صدر جمہوریہ کے دفتر کی جانب سے سوشل میڈیا پلیٹ فارم ایکس پر جاری پیغام میں کہا گیا، “گل ویر سنگھ، آپ کو اس شاندار کامیابی پر دل کی گہرائیوں سے مبارکباد۔ گلاسگو کامن ویلتھ گیمز 2026 میں مردوں کی 10 ہزار میٹر دوڑ میں سلور میڈل جیت کر آپ نے اس مقابلے میں بھارت کے لیے تاریخ کا پہلامیڈل حاصل کیا ہے۔ پوری قوم کو آپ پر فخر ہے۔ میری دعا ہے کہ آپ مستقبل میں بھی اسی طرح نئی کامیابیاں حاصل کرتے رہیں۔”

اتر پردیش کے وزیر اعلیٰ یوگی آدتیہ ناتھ نے بھی گل ویر سنگھ کی تاریخی کامیابی پر مبارکباد دیتے ہوئے ایکس پر لکھا، “ر کھیل 2026 میں مردوں کی 10 ہزار میٹر دوڑ میں سلور کا میڈل جیت کر بھارت کا نام روشن کرنے والے اتر پردیش کے سپوت اور نائب صوبیدار گل ویر سنگھ کو دل کی گہرائیوں سے مبارکباد۔ آپ کی یہ تاریخی کامیابی مسلسل محنت، نظم و ضبط اور وطن کے لیے غیر معمولی جذبۂ خدمت کی بہترین مثال ہے۔ پورے اتر پردیش اور ملک کو آپ پر فخر ہے۔”گلاسگو کے اسکاٹس ٹاؤن اسٹیڈیم میں منعقدہ مقابلے میں گل ویر سنگھ نے 27 منٹ 49.78 سیکنڈ میں دوڑ مکمل کرتے ہوئے دوسرا مقام حاصل کیا۔ آسٹریلیا کے کائی رابنسن نے 27 منٹ 48.93 سیکنڈ کے وقت کے ساتھ طلائی تمغہ جیتا، جب کہ آئل آف مین کے ڈیوڈ مولارکی نے 27 منٹ 50.28 سیکنڈ میں ریس مکمل کر کے کانسی کا تمغہ اپنے نام کیا۔گل ویر سنگھ یکم جون 1998 کو اتر پردیش کے ضلع علی گڑھ کے گاؤں سرسا میں پیدا ہوئے۔ وہ اس وقت بھارتی فوج میں نائب صوبیدار کے عہدے پر خدمات انجام دے رہے ہیں۔ ان کے ایتھلیٹکس کیریئر کا آغاز گاؤں کی پگڈنڈیوں، سڑکوں اور کھیتوں میں دوڑنے سے ہوا، جب وہ فوج میں بھرتی کی تیاری کر رہے تھے۔ سال 2018 میں بھارتی فوج کی دی گرینیڈیئرز رجمنٹ میں شامل ہونے کے بعد انہوں نے طویل فاصلے کی دوڑ میں مسلسل عمدہ کارکردگی دکھائی اور ملک کے نمایاں ایتھلیٹس میں اپنی جگہ بنائی۔

بین الاقوامی سطح پر گل ویر سنگھ نے پہلی بڑی کامیابی 2023 کی ایشیائی ایتھلیٹکس چیمپئن شپ میں 5000 میٹر دوڑ کا برانز میڈل جیت کر حاصل کی۔ اس کے بعد 2022 کے ایشیائی کھیلوں میں 10 ہزار میٹر دوڑ میں بھی کانسی کا میڈل اپنے نام کیا۔ سال 2025 میں جنوبی کوریا میں منعقدہ ایشیائی ایتھلیٹکس چیمپئن شپ میں انہوں نے 5000 میٹر اور 10 ہزار میٹر دونوں مقابلوں میں برا۔ز میڈل جیت کر ایشیا کے بہترین طویل فاصلے کے دھاوکوں میں اپنی مضبوط شناخت قائم کی۔ اب کامن ویلتھ گیمز 2026 میں چاندی کا تاریخی تمغہ جیت کر گل ویر سنگھ نے بھارتی ایتھلیٹکس کی تاریخ میں ایک اور سنہرا باب رقم کر دیا ہے۔

بھارت  ایکسپریس اردو