PM Modi on Bengal Elections: ’’حلف برداری کی تقریب میں شرکت کے لیے بنگال واپس آؤں گا‘‘ وزیراعظم نریندر مودی کا بنگال جیتنے کا دعویٰ

بیراک پور (مغربی بنگال): وزیراعظم نریندر مودی نے پیر کو مغربی بنگال میں دوسرے مرحلے کی ووٹنگ سے قبل بیراک پور میں وجے سنکلپ ریلی سے خطاب کرتے ہوئے ریاست میں بی جے پی کی جیت کا پراعتماد دعویٰ کیا۔ انہوں نے کہا کہ 4 مئی کے نتائج کے بعد وہ دوبارہ واپس آئیں گے تاکہ بھارتیہ جنتا پارٹی کی حلف برداری تقریب میں شرکت کرسکیں۔ اپنے خطاب میں وزیراعظم نے بنگال کے ساتھ اپنی گہری وابستگی کا ذکر کرتے ہوئے کہا کہ اس ریاست نے ان کی ذاتی اور روحانی زندگی میں اہم کردار ادا کیا ہے۔ انہوں نے کہا ’’بنگال کے ساتھ میری وابستگی شکتی کی بھکتی رہی ہے۔ یہ میری روحانی زندگی کا ایک اہم مرکز رہا ہے۔ یہاں کے عظیم شخصیات اور عوام کی محبت نے مجھے ہمیشہ متاثر کیا ہے۔‘‘ مودی نے کہا کہ موجودہ انتخابی مہم میں یہ ان کی آخری ریلی ہے اور انہوں نے ریاست بھر میں عوامی رجحان کو قریب سے دیکھا ہے۔ انہوں نے کہا ’’میں پورے اعتماد کے ساتھ واپس جا رہا ہوں کہ 4 مئی کے نتائج کے بعد مجھے بی جے پی کی حلف برداری میں شرکت کے لیے دوبارہ آنا پڑے گا۔‘‘ انہوں نے مزید کہا کہ انتخابی ریلیوں اور روڈ شوز کے دوران عوام کی جانب سے ملنے والے پیغامات اور تصویریں ان کے لیے بے حد قیمتی ہیں، جنہیں وہ رات کے وقت غور سے دیکھتے اور پڑھتے ہیں۔

سیاسی سفر اور عوام سے تعلق

وزیراعظم نے اپنے طویل سیاسی سفر کا ذکر کرتے ہوئے کہا کہ وہ گزشتہ تین سے چار دہائیوں سے مسلسل ملک کے مختلف حصوں کا دورہ کر رہے ہیں اور پارٹی کی ذمہ داریاں نبھا رہے ہیں۔ انہوں نے کہا ’’میں نے گھر چھوڑنے کے بعد آپ سب میں اپنا خاندان پایا ہے اور یہی میرے لیے سکون کا باعث ہے۔‘‘ بیراک پور اسمبلی حلقہ، جو مغربی بنگال کے شمالی 24 پرگنہ ضلع میں واقع ہے، دوسرے مرحلے کی ووٹنگ میں ایک سہ رخی مقابلے کا مرکز بنا ہوا ہے۔ یہاں ترنمول کانگریس، بی جے پی اور سی پی آئی (ایم) کے امیدواروں کے درمیان سخت مقابلہ متوقع ہے۔ ریلی سے قبل وزیراعظم نے کولکاتا کے تاریخی تھنٹھنیا کالی باری مندر میں دیوی کالی کے درشن کیے۔ یہ مندر تین سو سال سے زائد قدیم ہے اور مذہبی اہمیت رکھتا ہے۔ واضح رہے کہ مغربی بنگال اسمبلی انتخابات کے پہلے مرحلے میں 91.78 فیصد ووٹنگ ریکارڈ کی گئی تھی۔ دوسرے مرحلے کی پولنگ 29 اپریل کو ہوگی جبکہ ووٹوں کی گنتی 4 مئی کو کی جائے گی۔

بھارت ایکسپریس اردو۔