India-Korea Friendship Festival: بھارت-کوریا تعلقات ہزاروں سال پرانے، ثقافتی تبادلوں کے ذریعے مزید مضبوط ہو رہا ہے یہ رشتہ: وزیراعظم مودی

نئی دہلی: وزیراعظم نریندر مودی نے پیر کے روز جنوبی کوریا کے ساتھ ہندوستان کے گہرے اور قدیم تعلقات کو اجاگر کرتے ہوئے کہا کہ کے-پاپ اور کے-ڈراماز بھارت میں تیزی سے مقبول ہورہے ہیں۔ انہوں نے جنوبی کوریا کے صدر لی جے میونگ کے ساتھ مشترکہ پریس کانفرنس میں ’’انڈیا-کوریا فرینڈشپ فیسٹیول‘‘ کے آغاز کا اعلان کیا۔

20 سے 28 اپریل تک ثقافتی جشن

وزیراعظم مودی نے بتایا کہ یہ فیسٹیول 20 اپریل سے 28 اپریل تک منعقد ہوگا، جس کا مقصد دونوں ممالک کے ’’مشترکہ ثقافتی ورثے‘‘ کو منانا ہے۔ انہوں نے کہا کہ ہندوستان اور کوریا کے تعلقات ہزاروں سال پرانے ہیں اور آج یہ رشتہ ثقافتی تبادلوں کے ذریعے مزید مضبوط ہو رہا ہے۔

شہزادی سری رتنا اور قدیم رشتوں کا حوالہ

مودی نے ایودھیا کی شہزادی سری رتّنا (ملکہ ہیو ہوانگ اوک) اور کوریا کے بادشاہ کِم سورو کی داستان کا حوالہ دیتے ہوئے کہا کہ یہ کہانی دونوں ممالک کے مشترکہ ورثے کا اہم حصہ ہے۔ تاریخی روایات کے مطابق شہزادی سری رتّنا سمندر کے راستے کوریا گئیں اور وہاں گایا سلطنت کی پہلی ملکہ بنیں۔

کے-پاپ، ڈراماز اور ثقافتی مرکز کا قیام

بھارت میں کوریائی ثقافت کی بڑھتی مقبولیت کا ذکر کرتے ہوئے مودی نے کہا کہ بی ٹی ایس جیسے بینڈز کی بڑی فین فالوونگ ہے، جبکہ ’’Vincenzo’’، ‘‘Crash Landing On You‘‘ اور ’’Bloodhounds‘‘ جیسے ڈراماز بھی خاصے مقبول ہیں۔ دونوں ممالک نے ممبئی میں ’’کوریا سینٹر‘‘ قائم کرنے پر بھی اتفاق کیا ہے، جو کے-پاپ پرفارمنس اور کوریائی ثقافت کا مرکز ہوگا، اور بالی ووڈ و کے-پاپ کے امتزاج کی نمائندگی کرے گا۔ اعلیٰ سطحی مذاکرات کے بعد نئی دہلی کے حیدرآباد ہاؤس میں دونوں ممالک کے درمیان کئی مفاہمتی یادداشتوں (MoUs) کا تبادلہ بھی ہوا۔ یہ پیش رفت ہندوستان اور جنوبی کوریا کے درمیان سفارتی اور ثقافتی تعلقات کو مزید مضبوط بنانے کی جانب ایک اہم قدم قرار دی جا رہی ہے۔

بھارت ایکسپریس اردو۔