PM RAHAT Scheme: پی ایم راحت اسکیم کیا ہے؟ مودی حکومت کی یہ اسکیم فراہم کرے گی 1.5 لاکھ روپے تک کیش لیس علاج، بچائی جا سکیں گی جانیں

نئی دہلی: وزیراعظم نریندر مودی نے سڑک حادثات میں زخمی ہونے والے افراد کو فوری اور مفت طبی سہولت فراہم کرنے کے مقصد سے ’’پی ایم راحت‘‘ اسکیم کی منظوری دے دی ہے۔ اس اسکیم کے تحت متاثرین کو 1.5 لاکھ روپے تک کا کیش لیس علاج فراہم کیا جائے گا تاکہ بروقت طبی امداد ملنے سے قیمتی جانیں بچائی جا سکیں۔ حکومت کا مقصد یہ یقینی بنانا ہے کہ کسی بھی زخمی شخص کو مالی مسائل یا علاج میں تاخیر کی وجہ سے جان سے ہاتھ نہ دھونا پڑے۔

اس اسکیم کا مکمل نام ’’پردھان منتری روڈ ایکسیڈنٹ وکٹمز ہاسپٹلائزیشن اینڈ ایشورڈ ٹریٹمنٹ‘‘ (پی ایم راحت) ہے۔ وزیراعظم نے نئے دفتر ’’سیوا تیرتھ‘‘ سے اس منصوبے کی منظوری دی، جسے عوامی فلاح و بہبود کے لیے ایک اہم قدم قرار دیا جا رہا ہے۔ یہ اسکیم ملک کے تمام شہریوں کے لیے دستیاب ہوگی اور خاص طور پر سڑک حادثات کے متاثرین کو فوری مدد فراہم کرے گی۔

اس منصوبے کے تحت حادثے کے شکار افراد کو سرکاری اور منظور شدہ نجی اسپتالوں میں 1.5 لاکھ روپے تک کا مکمل کیش لیس علاج دیا جائے گا۔ مریض یا اس کے اہل خانہ کو علاج کے لیے کسی قسم کی فوری رقم ادا کرنے کی ضرورت نہیں ہوگی، کیونکہ تمام اخراجات حکومت برداشت کرے گی۔ غیر جان لیوا حالات میں 24 گھنٹے تک اور سنگین حالات میں 48 گھنٹے تک ابتدائی استحکام کا علاج فراہم کیا جائے گا، جبکہ مکمل علاج کی سہولت سات دن تک دستیاب رہے گی۔ اس اسکیم سے فائدہ اٹھانے کے لیے کسی رجسٹریشن، بیمہ یا آمدنی کے سرٹیفکیٹ کی ضرورت نہیں ہوگی۔

اسکیم کے تحت حادثے کے بعد متاثرہ شخص کو فوری طور پر قریبی منظور شدہ اسپتال منتقل کیا جائے گا، جہاں اسے کیش لیس علاج فراہم کیا جائے گا۔ علاج مکمل ہونے کے بعد اسپتال ڈیجیٹل نظام کے ذریعے حکومت سے اخراجات کا دعویٰ کرے گا۔ اس اسکیم میں خاص طور پر ’’گولڈن آور‘‘ یعنی حادثے کے فوراً بعد کے اہم وقت پر توجہ دی گئی ہے، کیونکہ اسی دوران بروقت علاج سے جان بچانے کے امکانات زیادہ ہوتے ہیں۔

بھارت میں ہر سال ہزاروں افراد سڑک حادثات میں زخمی یا ہلاک ہو جاتے ہیں، جن میں سے کئی افراد کو بروقت علاج نہ ملنے یا مالی مشکلات کی وجہ سے نقصان اٹھانا پڑتا ہے۔ حکومت کا ماننا ہے کہ پی ایم راحت اسکیم سے نہ صرف اموات کی شرح میں کمی آئے گی بلکہ متاثرہ خاندانوں پر مالی بوجھ بھی کم ہوگا۔ سڑک نقل وحمل اور شاہراہوں کے مرکزی وزیر نتن گڈکری نے اس اسکیم کو ایک اہم اور زندگی بچانے والا فیصلہ قرار دیا ہے۔ ان کے مطابق یہ منصوبہ شہریوں کی حفاظت اور فلاح کے لیے حکومت کے عزم کی عکاسی کرتا ہے اور اس سے ملک میں ہنگامی طبی امداد کے نظام کو مزید مضبوطی ملے گی۔

بھارت ایکسپریس اردو