Delhi Election 2025: ’’پرویش ورما نااہل ہونے کی پوری کوشش کر رہے، پر الیکشن کمیشن ہے کہ مانتا ہی نہیں…‘‘، اروند کیجریوال نے ای سی آئی  کو بنایا تنقید کا نشانہ

نئی دہلی: نئی دہلی سیٹ سے بی جے پی امیدوار پرویش ورما کے خلاف ضابطہ اخلاق کی خلاف ورزی پر ایف آئی آر درج کی گئی ہے۔ پرویش ورما اس سیٹ سے عام آدمی پارٹی کے قومی کنوینر اور سابق وزیر اعلی اروند کیجریوال کے خلاف الیکشن لڑ رہے ہیں۔

اروند کیجریوال پرویش ورما کے خلاف ایف آئی آر درج ہونے کے بعد سے ہی ان پر حملہ کر رہے ہیں۔ اروند کیجریوال نے سوشل میڈیا کے ذریعے پرویش ورما پر تنقید کی۔ دہلی کے سابق وزیر اعلی اروند کیجریوال نے ایکس پر ایک پوسٹ میں کہا، ’’بیچارے پرویش ورما نااہل ہونے کی پوری کوشش کر رہے ہیں، پر الیکشن کمیشن ہے کہ مانتا ہی نہیں۔‘‘

 

کیجریوال نے ایک اور پوسٹ میں کہا، ’’پوری دنیا کہہ رہی ہے کہ کھلے عام پیسہ اور سامان تقسیم کیا جا رہا ہے، لیکن الیکشن کمیشن کہہ رہا ہے کہ انہیں ثبوت اور گواہ نہیں مل رہے۔‘‘

 

دراصل نئی دہلی اسمبلی حلقہ کے ریٹرننگ آفیسر نے مندر مارگ پولیس اسٹیشن کے اسٹیشن ہاؤس آفیسر کو ایک خط لکھ کر پرویش ورما کے خلاف شکایت پر ایف آئی آر درج کرنے کو کہا تھا۔ شکایت میں کہا گیا ہے کہ پرویش ورما مندر مارگ پولیس اسٹیشن کے قریب والمیکی مندر کے احاطے میں ووٹروں کو جوتے بانٹ رہے تھے۔ اس کا ایک ویڈیو بھی وائرل ہوا ہے۔

غور طلب ہے کہ عام آدمی پارٹی نے سوشل میڈیا پر پرویش ورما کی مختلف سرگرمیوں جیسے پیسے، جوتے، کمبل اور ساڑیاں تقسیم کرنے کے کئی ویڈیوز لگاتار پوسٹ کیے اور الیکشن کمیشن سے اس کی شکایت بھی کی۔ عام آدمی پارٹی پرویش ورما کے بارے میں مسلسل شکایت کرتی رہی ہے کہ وہ پیسے کے دم پر نئی دہلی اسمبلی حلقہ سے الیکشن جیتنا چاہتے ہیں۔

بھارت ایکسپریس۔