وزیرریل اشونی ویشنونے بالاسور میں جائے حادثہ پر پہنچ کر حادثے ک جائزہ لیا۔ انہوں نے کہا کہ ایک ہائی پروفائل جانچ کمیٹی کی تشکیل کی جائے گی اورریلوے کمشنربھی آزادانہ جانچ کریں گے۔ ہمارا دھیان بچاؤ اور راحت کاموں پر ہے۔ ضلع انتظامیہ سے منظوری ملنے کے بعد بحالی شروع ہوگی۔ یہ حادثہ کیوں ہوا ہے، اس کا پتہ ریلوے کے سیفٹی کمشنر کے رپورٹ جمع کرنے کے بعد ہی چل جائے گا۔ اشونی ویشنو نے بالاسور کے اسپتال میں زخمیوں سے بھی ملاقات کی۔
اوڈیشہ کے وزیراعلیٰ نوین پٹنائک بھی جائے حادثہ پر پہنچے تھے۔ انہوں نے موقع پر موجود افسران اوروزیر ریل اشونی ویشنو سے بات کرکے صورتحال کا جائزہ لیا۔ انہوں نے بالاسور کے اسپتال پہنچ کرحادثے میں زخمی افراد سے ملاقات کی۔ انہوں نے کہا کہ یہ ایک بے حد افسوسناک ٹرین حادثہ ہے۔ مجھے مقامی ٹیموں، مقامی افراد اور دیگر لوگوں کا شکریہ ادا کرنا ہے، جنہوں نے لوگوں کو ملبے سے بچانے کے لئے پوری رات کام کیا ہے۔ ریلوے سیکورٹی کو ہمیشہ اولین ترجیح دی جانی چاہئے۔ لوگوں کو بالاسوراورکٹک کے اسپتالوں میں لے جایا گیا ہے تاکہ وہ جلد ازجلد ٹھیک ہوجائیں۔
کیسے ہوا یہ ٹرین حادثہ؟
بالا سور میں بہانگا بازار اسٹیشن کے قریب ہوئے اس خطرناک حادثے سے متعلق ریلوے نے جانچ کمیٹی تشکیل کردی ہے۔ حادثہ کیسے ہوا، اسے لے کرعینی گواہوں کے بیان بھی سامنے آئے ہیں۔ کہا جا رہا ہے کہ آؤٹرلائن پر مال گاڑی کھڑی تھی… ہاؤڑہ سے آرہی کورومنڈل ٹرین (جوکہ چنئی جارہی تھی) 300 میٹر پر پہلے ڈریل ہوگئی۔ کورو منڈل ٹرین کا انجن مال گاڑی پر چڑھ گیا اور کورو منڈل ٹرین کے پیچھے والے ڈبے تیسرے ٹریک پر جاگری اور تیسرے ٹریک پر تیزی سے آرہی یشونت پور ایکسپریس ٹریک پر گرے ڈبوں سے ٹکراگئی۔