Mental Health Awareness Program: این ایس ایس، علی گڑھ مسلم یونیورسٹی کے زیر اہتمام ذہنی صحت سے متعلق بیداری پروگرام

علی گڑھ،22 جنوری: قومی خدمت اسکیم (این ایس ایس)، علی گڑھ مسلم یونیورسٹی کے تحت ذہنی صحت کے موضوع پر ایک تفصیلی بیداری پروگرام منعقد کیا گیا، جس کا مقصد طلبہ و نوجوانوں میں ذہنی دباؤ، اضطراب اور نفسیاتی مسائل کے بارے میں شعور اجاگر کرنا تھا۔ پروگرام میں این ایس ایس کے رضاکاروں کے علاوہ اساتذہ کی بڑی تعداد موجود رہی۔

ذہنی صحت کے تئیں سنجیدگی کی ضرورت

اس موقع پر این ایس ایس کے پروگرام آفیسر، شعبۂ تعلیم، علی گڑھ مسلم یونیورسٹی کے اسوسی ایٹ پروفیسر ڈاکٹر محمد حنیف احمد نے اپنے خطاب میں کہا کہ موجودہ دور میں تعلیمی دباؤ، مسابقت، بے یقینی اور سماجی مسائل کے باعث نوجوانوں میں ذہنی مسائل تیزی سے بڑھ رہے ہیں، لیکن افسوسناک بات یہ ہے کہ ذہنی صحت کو آج بھی سنجیدگی سے نہیں لیا جاتا۔ انہوں نے کہا کہ ذہنی بیماری کوئی کمزوری نہیں بلکہ ایک حقیقت ہے، جس کا بروقت ادراک اور علاج ضروری ہے۔ ڈاکٹر محمد حنیف احمد نے اس بات پر زور دیا کہ این ایس ایس کا کردار صرف سماجی خدمت تک محدود نہیں بلکہ طلبہ کی فکری، ذہنی اور اخلاقی تربیت بھی اس کے بنیادی مقاصد میں شامل ہے۔ انہوں نے مزید کہا کہ اگر ذہنی صحت کو نظر انداز کیا جائے تو اس کے اثرات فرد کے ساتھ ساتھ پورے سماج پر مرتب ہوتے ہیں۔ ایسے میں تعلیمی اداروں کی ذمہ داری بنتی ہے کہ وہ طلبہ کو نہ صرف تعلیم دیں بلکہ انہیں ذہنی طور پر مضبوط اور باشعور بھی بنائیں۔

 ذہنی صحت بھی جسمانی صحت کی طرح اہم

اسی پروگرام سے خطاب کرتے ہوئے این ایس ایس کے پروگرام کوآرڈی نیٹر اور اے ایم یو پولی ٹیکنک کے اسوسی ایٹ پروفیسر ڈاکٹر محمد محسن خان نے کہا کہ ذہنی صحت سے متعلق آگاہی پیدا کرنا آج کے سماج کی ایک اہم ضرورت بن چکا ہے۔ انہوں نے کہا کہ بدقسمتی سے ہمارے معاشرے میں ذہنی بیماریوں کو اب بھی شرمندگی اور غلط فہمی کے ساتھ جوڑا جاتا ہے، جس کے باعث متاثرہ افراد بروقت مدد حاصل نہیں کر پاتے۔ اس سوچ کو بدلنا بے حد ضروری ہے۔ ڈاکٹر محمد محسن خان نے این ایس ایس کے رضاکاروں پر زور دیا کہ وہ سماج میں بیداری کا پیغام لے کر جائیں اور لوگوں کو یہ سمجھائیں کہ ذہنی صحت بھی جسمانی صحت کی طرح اہم ہے۔ انہوں نے کہا کہ بروقت رہنمائی، مشاورت اور مثبت سوچ کے ذریعے ذہنی مسائل پر قابو پایا جا سکتا ہے۔ این ایس ایس اس سمت میں ایک مؤثر پلیٹ فارم فراہم کرتا ہے، جہاں طلبہ سماج کی خدمت کے ساتھ ساتھ خود بھی شعور و آگہی حاصل کرتے ہیں۔

پروگرام کے دوران این ایس ایس کے رضاکاروں نے بینرز اور پیغامات کے ذریعے ذہنی صحت سے متعلق بیداری پیدا کی اور اس عزم کا اظہار کیا کہ وہ مستقبل میں بھی ایسے سماجی اور تعمیری پروگراموں کے ذریعے عوام میں شعور اجاگر کرتے رہیں گے۔ آخر میں منتظمین نے اس پروگرام کو کامیاب بنانے پر تمام شرکاء کا شکریہ ادا کیا۔

بھارت ایکسپریس اردو۔