Juma Namaz Break Row: ’’نماز پڑھنے سے کسی کو نہیں روکا جا رہا…یہ جھوٹا پروپیگنڈہ ہے…‘‘، سی ایم ہمنتا کے فیصلے پر بی جے پی لیڈر شاہنواز حسین کی وضاحت

پٹنہ: آسام اسمبلی نے جمعہ کی نماز ادا کرنے کے لیے دو گھنٹے کے بریک کے اصول کو ختم کر دیا ہے۔ اس پر ملک میں سیاست تیز ہو گئی ہے اور اپوزیشن لیڈران سی ایم ہمنتا بسوا سرما پر حملہ آور ہیں۔ وہیں، اس مسئلے پر میڈیا سے بات کرتے ہوئے بی جے پی لیڈر شاہنواز حسین نے کہا کہ یہ جھوٹا پروپیگنڈہ ہے کہ نماز پڑھنے سے کسی کو روکا جا رہا ہے۔

شاہنواز حسین نے کہا کہ کسی کو بھی نماز پڑھنے میں کوئی دقت نہیں ہے۔ جس کو نماز پڑھنا ہے وہ پڑھیں گے لیکن اس کی وجہ سے دوسرے لوگوں کی بھی چھٹی ہوتی تھی، ان کی چھٹی ختم کر دی گئی ہے۔ ہندوستان کی سرزمین پر جس کو نماز پڑھنا ہے، انہیں کوئی روک نہیں ہے۔ یہ جھوٹا پروپیگنڈہ ہے کہ نماز پڑھنے سے کسی کو روکا جا رہا ہے۔

انہوں نے کہا کہ جمعہ کی نماز ہو یا پھر پانچ وقت کی نماز۔ کسی کو بھی نہیں روکا جا رہا۔ جس کو نماز پڑھنا ہے وہ پڑھ سکتے ہیں۔ آپ کو بتاتے چلیں کہ قواعد میں ترمیم کے بعد آسام اسمبلی کی کارروائی اب جمعہ کے روز بغیر کسی معطلی کے روزانہ صبح 9:30 بجے شروع ہوگی۔ یہ فیصلہ جاری اجلاس کے آخری روز کیا گیا۔

حکم نامے کے ایک اقتباس میں کہا گیا ہے، ’’آسام اسمبلی کی تشکیل کے بعد سے، جمعہ کے روز اسمبلی کا اجلاس 11 بجے تک ملتوی کر دیا جاتا تھا تاکہ مسلم اراکین نماز کے لیے جا سکیں۔ مسلم اراکین کے نماز سے واپس آنے کے بعد دوپہر کے وقت کھانے کے بعد اسمبلی کی کارروائی دوبارہ شروع ہو ہوتی تھی، دوسرے دنوں میں ایوان کی کارروائی مذہبی مقاصد کے لیے بغیر کسی ملتوی کے جاری رہتی تھی۔

وہیں، شاہنواز حسین نے آر جے ڈی لیڈر تیجسوی یادو پر بھی حملہ کیا۔ ریزرویشن اور ذات پات کی مردم شماری کو لے کر یکم ستمبر کو ہونے والے احتجاج پر شاہنواز حسین نے کہا کہ تیجسوی یادو ایکٹیو ہو گئے ہیں، لیکن اس سے پہلے وہ نظر نہیں آ رہے تھے۔

لوک سبھا انتخابات کے بعد وہ کہاں تھے اور کیا کر رہے تھے؟ یہ ان کی پارٹی کا معاملہ ہے لیکن اب وہ ایکٹیو ہو گئے ہیں۔ ان کی پارٹی کو پوری کوشش کے ساتھ لڑنا چاہئے، دیر سے شروع کیا ہے، لیکن درست کیا ہے۔ وہ مظاہرہ کریں، کون روک رہا ہے؟

بھارت ایکسپریس۔