Monsoon Session 2023: راہل گاندھی نے اڈانی پر حکومت کو گھیرا تو اسمرتی ایرانی نے اس انداز میں دیا جواب

No Confidence Motion: کانگریس لیڈراوررکن پارلیمنٹ راہل گاندھی بدھ (9 اگست 2023) کو مودی حکومت کے خلاف لائی گئی تحریک عدم اعتماد کی تحریک پربحث کے دوران لوک سبھا میں بول رہے تھے۔ اس دوران انہوں نے اپنے خطاب میں مودی حکومت کوگھیرتے ہوئے اڈانی کے ساتھ ان کے نام کو جوڑا۔ اس کے بعد بولنے کے لئے کھڑی ہوئیں مرکزی وزیراسمرتی ایرانی نے پلٹ وارکرتے ہوئے کانگریس اوراڈانی کے درمیان تعلقات کوگنوایا۔

راہل گاندھی نے اپنے خطاب میں صنعت کارگوتم اڈانی کا ذکرکرتے ہوئے کہا، ”میں نے پچھلی باراڈانی جی پرفوکس کیا توآپ کے سینئرلیڈران کوتکلیف ہوئی، جس سے آپ کو بھی تکلیف ہوئی، اس کے لئے میں آپ سے معافی مانگتا ہوں۔ آج کوئی گھبرانے کی ضرورت نہیں ہے کیونکہ آج میں اڈانی جی کے بارے میں نہیں بولوں گا۔“

پارلیمنٹ میں اسمرتی ایرانی نے کیا پلٹ وار

مرکزی وزیر برائے خواتین واطفال اسمرتی ایرانی نے راہل گاندھی کا خطاب ختم ہونے کے بعد کہا، ”یہ تب سے اڈانی-اڈانی کر رہے ہیں تو تھوڑا میں بھی ان کو ان کے ساتھ تعلقات کے بارے میں بتا دیتی ہوں۔ تصویر میرے پاس بھی ہے، اگراڈانی اتنا ہی خراب ہے تو جیجا جی (پرینکا گاندھی کے شوہر رابرٹ واڈرا) ان کے ساتھ کیا کر رہے ہیں؟“

اسمرتی ایرانی نے مزید کہا، ”نشی کانت جی نے سچ کہا تھا کہ کانگریس بیٹے کو سیٹ کرنے کی کوشش کر رہی ہے تو داماد جی کو بھینٹ کرنے کی کوشش کر رہی ہے۔ انہوں نے کہا کہ 1993 میں مندرا پورٹ میں کانگریس حکومت نے اڈانی کو جگہ دی تب اس ملک کے وزیرخزانہ منموہن سنگھ تھے اوراس ملک کے وزیراعظم بھی کانگریس کے ہی تھے۔“

اسمرتی ایرانی نے اڈانی سے تعلقات پر کانگریس کو گھیرا

اسمرتی ایرانی نے دعویٰ کیا کہ یوپی اے کی مدت کارمیں انہوں نے اڈانی کو 72 ہزار کروڑ روپئے کا لون دیا، راجستھان میں 60 ہزار کروڑ روپئے سے زیادہ کا گہلوت جی نے اڈانی کے ساتھ معاہدہ کرلیا اور 20 ہزار ایکڑزمین لے لیا۔ کیرلا میں پورٹ کا کام اڈانی کو کیوں دیا؟ مہاراشٹر میں جب کانگریس کے پاس اقتدار تھی تب انہوں نے پورٹ کا کام اڈانی کو کیوں دیا؟ مغربی بنگال میں اڈانی کو پورٹ کیوں دیا گیا، چھتیس گڑھ میں آدیواسیوں کی مخالفت کے باوجود اڈانی کو کام کیوں دیا گیا۔ ان تمام موضوعات پر کاگنریس آخر خاموش کیوں رہتی ہے؟