Nitish Kumar changes party for kursi: کبھی ہماری گود میں،کبھی بی جے پی کی گود میں بیٹھ جاتے ہیں نتیش کمار،پی ایم مودی جھوٹ کی فیکٹری چلا رہے ہیں:کھرگے

بہار میں اس سال کے آخر میں اسمبلی انتخابات ہونے والے ہیں۔ انتخابات کے حوالے سے ریاست میں سیاسی سرگرمیاں بڑھ گئی ہیں۔ اتوار کو کانگریس کے صدر ملکارجن کھرگے نے بہار کے بکسر کے دلساگر اسٹیڈیم میں منعقد ‘جئے باپو، جئے بھیم، جئے سمویدھان’ ریلی سے خطاب کیا۔ اس دوران انہوں نے نتیش کمار اور بھارتیہ جنتا پارٹی (بی جے پی) کے اتحاد کو موقع پرست قرار دیا۔ انہوں نے نیشنل ہیرالڈ کیس میں پی ایم نریندر مودی، امت شاہ اور آر ایس ایس پر دھمکی آمیز سیاست کا الزام بھی لگایا۔

ملکارجن کھرگے نے کہا کہ بہار میں سی ایم نتیش کمار اور بی جے پی کا اتحاد موقع پرست ہے۔ نتیش صرف اقتدار کی خاطر بار بار پلٹی مارتے رہتے ہیں۔ نتیش نے اس شخص کے ساتھ اتحاد کیا جس نے مہاتما گاندھی کا قتل کیا تھا۔بہار کے لوگوں کو سی ایم نتیش سے پوچھنا چاہئے کہ 2015 میں وزیر اعظم نریندر مودی نے ریاست کے ساتھ جو 1.25 لاکھ کروڑ روپے کے پیکیج کا وعدہ کیا تھا اس کا کیا ہوا؟ پی ایم مودی جھوٹ کی فیکٹری چلا رہے ہیں۔ این ڈی اے حکومت کو اس بار بہار سے جانا چاہئے۔

کانگریس صدر ملکارجن کھرگے نے عوام سے اس اسمبلی الیکشن میں عظیم اتحاد کو ووٹ دینے کی اپیل کی ہے۔ملکارجن کھرگے نے الزام لگایا کہ مودی اور نتیش کی جوڑی ملک کے دلتوں، قبائلیوں، پسماندہ طبقات اور کسانوں کے مفادات کو نقصان پہنچانے کا کام کر رہی ہے۔ انہوں نے کہا کہ یہ دونوں رہنما ملک کی بھلائی کے لیے نہیں بلکہ اقتدار میں رہنے کے لیے اتحاد بنا رہے ہیں۔کانگریس صدر نے کہا کہ بی جے پی اور جے ڈی یو ‘ڈبل انجن’ والی حکومت کی بات کرتے ہیں، لیکن آج بہار ہیومن انڈیکس کے لحاظ سے بہت نیچے ہے۔ انہوں نے کہا کہ بہار کو ‘ڈبل انجن’ نہیں بلکہ سنگل طاقتور انجن کی ضرورت ہے، جو عظیم اتحاد کا انجن ہے۔

انہوں نے کہا کہ وقف (ترمیمی) ایکٹ بی جے پی-آر ایس ایس کی برادریوں میں تقسیم پیدا کرنے کی سازش ہے۔ نتیش کمار کو نشانہ بناتے ہوئے انہوں نے کہا کہ وہ ’’ادھر اور ادھر کا کھیل‘‘ کھیلتے رہتے ہیں۔ انہوں نے عوام سے بہار کی ترقی کے لیے بی جے پی اور نتیش کمار کو ہٹانے اور یہاں کی تعلیمی سطح کو بہتر بنانے کی اپیل کی۔ملکارجن کھرگے نے کہا کہ بھارتیہ جنتا پارٹی کے لیڈر اب بہار کی عوام کو گمراہ نہیں کر سکتے۔ بہار کی عوام اس بار انتخابات میں ان کے بہکاوے میں آنے والی نہیں ہیں۔انہوں نے کہا کہ کانگریس پارٹی کے سامنے جھکنے کی کوشش کی جارہی ہے، لیکن کانگریس پارٹی نہیں جھکے گی۔ بہار میں عظیم اتحاد کی حکومت کی تشکیل کا مطالبہ کرتے ہوئے کانگریس لیڈر نے کہا کہ ہمیں متحد رہنا ہوگا اور آئین کو بچانے کے لیے لڑنا ہوگا۔ملکارجن کھرگے نے کہا کہ بی جے پی اور سنگھ جان بوجھ کر وقف ترمیمی بل لائے ہیں۔ تاکہ برادریوں کے درمیان دراڑ پیدا کی جا سکے۔

بھارت ایکسپریس۔