Textile Sector Meets Finance Minister Over US Tariff Concerns: نرملا سیتارمن نے امریکی ٹیرف سے متاثر ٹیکسٹائل صنعت کے نمائندوں سے کی ملاقات، درپیش مسائل پر کیا تبادلۂ خیال

مرکزی وزیر خزانہ نرملا سیتا رمن نے منگل کے روز چنئی میں ٹیکسٹائل صنعت کے نمائندوں سے ایک اہم مشاورتی ملاقات کی۔ یہ ملاقات ان اقتصادی چیلنجز کے تناظر میں کی گئی جو حالیہ دنوں میں بھارت کی ٹیکسٹائل صنعت کو درپیش آئے ہیں، خصوصاً امریکہ کی جانب سے درآمدی ٹیرف میں 50 فیصد تک اضافے کے بعد پیدا ہونے والی صورت حال۔ اس ملاقات میں بھارتیہ جنتا پارٹی (بی جے پی) کے تمل ناڈو یونٹ کے صدر نائنار ناگنتھیرن اور پارٹی کی قومی خواتین ونگ کی صدر اور کوئمبٹور ساؤتھ سے ایم ایل اے ونتھی سری نواسن نے بھی شرکت کی۔ ملاقات کا مقصد اس صنعت سے وابستہ مسائل کو براہ راست سننا اور ان کے ممکنہ حل پر غور کرنا تھا۔

یاد رہے کہ حال ہی میں تمل ناڈو کے وزیراعلیٰ ایم کے اسٹالن نے دعویٰ کیا ہے کہ امریکی درآمدی ٹیرف میں 50 فیصد تک اضافے سے ریاست کی برآمدات بری طرح متاثر ہوئی ہیں، جس کا سب سے زیادہ اثر تروپور کے علاقے پر پڑا ہے۔ ان کے مطابق اس سے ریاست کو تقریباً 3,000 کروڑ روپے کی برآمدی نقصان کا سامنا کرنا پڑا ہے، جب کہ ہزاروں افراد کی ملازمتیں خطرے میں پڑ گئی ہیں۔ وزیراعلیٰ اسٹالن نے مرکزی حکومت سے مطالبہ کیا ہے کہ وہ فوری طور پر متاثرہ صنعتوں اور مزدوروں کے تحفظ کے لیے ایک ریلیف اور ساختی اصلاحات پر مبنی پیکیج کا اعلان کرے، تاکہ ریاست کی اقتصادی سرگرمیوں کو سہارا دیا جا سکے۔

اسی مسئلے پر MNM پارٹی کے بانی اور رکن پارلیمان کمل ہاسن نے بھی مرکز اور ریاستی حکومتوں سے اپیل کی ہے کہ وہ بھارتی برآمد کنندگان کے لیے فوری ریلیف اقدامات متعارف کرائیں، تاکہ وہ بین الاقوامی منڈی میں اپنی مسابقت برقرار رکھ سکیں۔ واضح رہے کہ ٹیکسٹائل صنعت بھارت کی برآمدات کا ایک اہم ستون ہے اور اس پر عالمی معاشی حالات اور پالیسی تبدیلیوں کا براہِ راست اثر پڑتا ہے۔ اس تناظر میں نرملا سیتا رمن کی اس صنعت کے نمائندوں سے ملاقات اہم پیش رفت تصور کی جا رہی ہے۔

بھارت ایکسپریس اردو