NEET UG Paper Leak: نیٹ یو جی پیپر لیک معاملے کے ملزم یش یادو نے دوبارہ امتحان اور بہن کی شادی میں شرکت کے لیے مانگی عبوری ضمانت

نئی دہلی: نیٹ یو جی (NEET-UG) پرچہ لیک معاملے کے ملزم یش یادو نے 21 جون کو ہونے والے دوبارہ امتحان میں شرکت اور اپنی بہن کی شادی میں شامل ہونے کے لیے 15 دن کی عبوری ضمانت کی درخواست دائر کی ہے۔ راؤز ایونیو عدالت نے منگل کو اس درخواست پر مرکزی تفتیشی بیورو (سی بی آئی) سے جواب طلب کر لیا۔ خصوصی جج (سی بی آئی) اجے گپتا نے سی بی آئی کو جواب داخل کرنے کے لیے وقت دیتے ہوئے معاملے کی اگلی سماعت 12 جون مقرر کی ہے۔ سماعت کے دوران عدالت نے یاد دلایا کہ 2 جون کو یش یادو کی ایک درخواست منظور کی گئی تھی، جس میں اسے نیٹ یو جی امتحان کی تیاری کے لیے کتابیں رکھنے کی اجازت دی گئی تھی۔ عدالت نے اس وقت نوٹ کیا تھا کہ دوبارہ امتحان 21 جون کو منعقد ہونا ہے۔ یش یادو کی جانب سے وکلا کپل یادو اور امبیکا عدالت میں پیش ہوئے۔

امتحان کی تیاری کے لیے کتابوں کی اجازت

اس سے قبل عدالت کو بتایا گیا تھا کہ یش یادو نے 3 مئی کو منعقد ہونے والے نیٹ یو جی امتحان میں شرکت کی تھی۔ اس کے وکیل نے استدعا کی تھی کہ اسے امتحان کی تیاری کے لیے مطالعاتی مواد اور کتابوں تک رسائی دی جائے۔ سماعت کے دوران عدالت نے وکیل سے استفسار کیا تھا کہ کیا انہوں نے اس بات کی تصدیق کر لی ہے کہ چونکہ یش یادو اس مقدمے میں ملزم ہے، اس لیے نیشنل ٹیسٹنگ ایجنسی (این ٹی اے) اسے امتحان میں بیٹھنے کی اجازت دے گی یا نہیں؟ عدالت نے یہ بھی پوچھا کہ کیا اسے ایڈمٹ کارڈ جاری کیا گیا ہے۔

پرچہ لیک کا الزام اور 10 لاکھ روپے کا لین دین

مقدمے کے مطابق 12 مئی کو ایک سرکاری افسر کی شکایت پر بھارتیہ نیائے سنہتا (BNS)، انسدادِ بدعنوانی قانون اور امتحانات میں ناجائز ذرائع استعمال کرنے سے متعلق دفعات کے تحت ایف آئی آر درج کی گئی تھی۔ تفتیشی ایجنسی کے مطابق منگی لال بیوال نے اپنے بیٹے وکاس بیوال کے لیے سوالیہ پرچہ حاصل کرنے کی غرض سے شبھم خیرنار سے رابطہ کیا، جس کے بعد دیگر ملزمان پر مشتمل ایک وسیع نیٹ ورک وجود میں آیا۔ الزام ہے کہ شبھم خیرنار نے سب سے پہلے پرچہ یش یادو کو فراہم کیا، پھر یش یادو نے اسے منگی لال بیوال تک پہنچایا، جہاں سے یہ وکاس بیوال اور بعد ازاں دنیش بیوال تک پہنچا۔ سی بی آئی کے مطابق منگی لال بیوال نے مبینہ طور پر یش یادو سے 10 لاکھ روپے کے عوض لیک شدہ نیٹ پرچہ حاصل کیا تھا۔ تفتیش کے دوران وکاس بیوال نے بتایا کہ اس کی یش یادو سے ملاقات راجستھان کے سیکر میں کوچنگ کے دوران ہوئی تھی۔ مزید الزام ہے کہ منگی لال بیوال نے بعد میں یہ پرچہ مختلف امیدواروں کو تقریباً 12 لاکھ روپے میں فروخت کیا۔ اس مقدمے میں سی بی آئی کئی دیگر ملزمان کو بھی گرفتار کر چکی ہے، جن میں شبھم خیرنار، منیشا واگھمارے، پرہلاد کلکرنی، منیشا منڈھارے، منیشا سنجے حوالدار، شیوراج رگھوناتھ موٹیگاونکر، ڈاکٹر منوج شیروڑے اور تیجس ہرشد کمار شاہ شامل ہیں۔ سی بی آئی کی پوچھ گچھ کے بعد تمام ملزمان اس وقت عدالتی حراست میں ہیں۔

بھارت ایکسپریس اردو۔