MP CM Said Regarding Muslim Reservation: مسلم ریزرویشن پر مدھیہ پردیش کے وزیراعلیٰ موہن یادو نے دیا بڑا بیان

لوک سبھا انتخابات کے لیے سیاسی جماعتوں کی انتخابی مہم جاری ہے۔ مدھیہ پردیش میں بی جے پی کی توجہ تمام 29 لوک سبھا سیٹیں جیتنے پر ہے۔ مدھیہ پردیش میں بھی بی جے پی نے اسمبلی انتخابات کے بعد قیادت بدل دی اور موہن یادو کو وزیر اعلیٰ بنا دیا۔ موہن یادو کو وزیر اعلیٰ بنانے کے پیچھے حکمت عملی یوپی-بہار کے یادو ووٹروں تک پہنچنا ہے۔

موہن یادو یادو ووٹروں تک کیسے پہنچیں گے؟

موہن یادو سے ایک انٹرویو کے دوران جب پوچھا گیا کہ بی جے پی نے آپ کو یادیو ووٹرز تک پہنچنے کے لیے گزشتہ چند مہینوں میں یوپی اور بہار کا دورہ کرنے کا کام سونپا ہے؟ جواب میں موہن یادو نے کہا، ”بی جے پی ذات، نسب یا روایت کو نہیں دیکھتی ہے۔ میں ایک مزدور کا بیٹا ہوں۔ یہ صرف بی جے پی ہی ہے جو کسی بھی پارٹی کارکن کو موقع دے سکتی ہے۔ یادو برادری سے ہونے کے ناطے اگر میں ہم وطنوں کو بتا سکتا ہوں کہ اس ملک میں ہر برادری کے لوگوں کو یکساں مواقع مل رہے ہیں تو اس میں غلط کیا ہے؟ ہمارا ملک اپنے تنوع کے لیے جانا جاتا ہے۔

مسلم ریزرویشن پر دیاجواب

اس کے بعد موہن یادو سے پوچھا گیا کہ  بی جے پی الزام لگاتی ہے کہ اگر کانگریس اقتدار میں آتی ہے تو وہ او بی سی کے حصے سے مسلمانوں کو ریزرویشن دے گی؟ اس کے جواب میں انہوں نے کہا کہ ’’افواہوں یا الزامات کے بجائے حقائق پر بھروسہ کرنا ضروری ہے۔ کانگریس نے سوائے جھوٹ اور ملک سے غداری کے کچھ نہیں کیا۔ پچھلے 10 سالوں میں، پی ایم مودی نے ریزرویشن  ختم نہیں کیے اور سماجی انصاف اور تاریخی طور پر پسماندہ کمیونٹیز کے لیے مساوی مواقع کو یقینی بنانے کے لیے کسی سے بھی زیادہ محنت کی ہے۔ موجودہ ریزرویشن کا نظام مذہب کی بنیاد  پر نہیں بلکہ سماجی اور معاشی معیار پر مبنی ہے۔

کانگریس کو نشانہ بناتے ہوئے موہن یادو نے کہا، ”کانگریس نے اپنے پورے دور اقتدارمیں صرف آئین کی توہین کی ہے۔ جب اندرا گاندھی نے سیاسی اقتدار برقرار رکھنے کے لیے ایمرجنسی نافذ کی تو کانگریس نے آئین کی روح کو مار ڈالا۔ کانگریس لیڈر جو رام مندر جا کر آشیرواد لینے بھی نہیں گئے وہ آئین کی بات کر رہے ہیں۔ وہ اپنی اخلاقی بنیاد کھو چکے ہیں۔ پچھلے 10 سالوں سے، پی ایم مودی نے آئین کے بنیادی ڈھانچے کو برقرار رکھنے کے علاوہ کچھ نہیں کیا ہے۔

کانگریس کی دولت کی تقسیم پر موہن یادو نے کہا، “کانگریس نے لوگوں کی دولت چھیننے اور اسے دراندازوں میں بانٹنے کی سازش کی ہے اور اسی لیے وہ شہریت ترمیمی قانون کی مخالفت کر رہے ہیں اور دولت کی دوبارہ تقسیم کی بات کر رہے ہیں۔ یہ ایک اور دھوکہ کے سوا کچھ نہیں ہے۔

بھارت ایکسپریس۔