Digital Fatigue: زیادہ اسکرین ٹائم سے نوجوان ’اسمارٹ فون برین‘ کا شکار، ماہرین نے کیا خبردار

نئی دہلی : اسمارٹ فون کا ضرورت سے زیادہ استعمال نوجوانوں کی دماغی صحت پر منفی اثرات مرتب کر رہا ہے اور ماہرین اسے “اسمارٹ فون برین” جیسی کیفیت سے جوڑ رہے ہیں۔ نیورولوجسٹ کے مطابق اب بڑی تعداد میں نوجوان اور نوعمر افراد سر درد، توجہ کی کمی، خراب نیند، چکر آنا، ذہنی دھند، یادداشت کی کمزوری اور چھوٹی چھوٹی باتیں بھول جانے جیسی شکایات کے ساتھ اسپتالوں کا رخ کر رہے ہیں۔سی کے برلا ہاسپٹلز، سی ایم آر آئی کے نیورولوجسٹ ڈاکٹر دیپ داس کے مطابق موبائل فون نے کام، تعلیم اور رابطے کے طریقے بدل دیے ہیں، لیکن اس کا بے تحاشا اور غیر متوازن استعمال دماغی کارکردگی، توجہ، نیند اور مزاج پر منفی اثر ڈال سکتا ہے۔ ان کا کہنا ہے کہ مسلسل نوٹیفکیشن، سوشل میڈیا پر لامتناہی اسکرولنگ اور بار بار مختلف ایپس کے درمیان آنا جانا دماغ کو ہر وقت متحرک رکھتا ہے، جس سے کسی ایک کام پر دیر تک توجہ مرکوز رکھنا مشکل ہو جاتا ہے۔ماہرین کے مطابق رات گئے تک موبائل استعمال کرنے سے اسکرین کی نیلی روشنی (بلو لائٹ) جسم میں میلاٹونن ہارمون کی پیداوار کو کم کر دیتی ہے، جو نیند کے نظام کو کنٹرول کرتا ہے۔ نتیجتاً نیند متاثر ہوتی ہے، یادداشت کمزور پڑ سکتی ہے اور بے چینی، ذہنی دباؤ اور مسلسل سر درد جیسے مسائل پیدا ہو سکتے ہیں۔

ڈاکٹروں کا کہنا ہے کہ طویل وقت تک گردن جھکا کر موبائل استعمال کرنے سے گردن اور کندھوں کے پٹھوں پر دباؤ بڑھ جاتا ہے، جس سے “ٹیکسٹ نیک”، ٹینشن ہیڈیک اور مائگرین کی شکایات میں اضافہ ہو سکتا ہے۔ مسلسل اسکرین دیکھنے سے ذہنی تھکن، چڑچڑاپن، کام میں عدم دلچسپی اور نئی معلومات کو سمجھنے یا یاد رکھنے میں دشواری بھی پیدا ہو سکتی ہے۔

ماہرین کا کہنا ہے کہ بچوں اور نوعمر افراد پر اس کے اثرات زیادہ سنگین ہو سکتے ہیں کیونکہ ان کا دماغ ابھی مکمل طور پر نشوونما نہیں پاتا۔ ضرورت سے زیادہ اسکرین ٹائم ان کی تعلیم، نیند، جسمانی سرگرمیوں اور سماجی رویوں کو متاثر کر سکتا ہے۔ڈاکٹروں نے واضح کیا کہ مسئلہ اسمارٹ فون نہیں بلکہ اس کا غیر متوازن استعمال ہے۔ انہوں نے 20-20-20 اصول اپنانے کا مشورہ دیا، یعنی ہر 20 منٹ بعد 20 سیکنڈ کے لیے تقریباً 20 فٹ دور کسی چیز کو دیکھیں۔ اس کے علاوہ باقاعدگی سے اسکرین سے وقفہ لیں، سونے سے کم از کم ایک گھنٹہ پہلے موبائل استعمال بند کریں، درست انداز میں بیٹھیں، روزانہ ورزش کریں اور کچھ وقت کھلی فضا میں ضرور گزاریں۔

بھارت ایکسپریس اردو