Major fire engulfs parking: ریلوے اسٹیشن کی پارکنگ میں خوفناک آتشزدگی،200 سے زائد گاڑیاں جل کر خاک

اتوار کے روز تمل ناڈو کے تریسور ریلوے اسٹیشن پر ایک بڑا حادثہ پیش آیا، جہاں اسٹیشن کے قریب بنی پارکنگ میں اچانک بھیانک آگ بھڑک اٹھی۔ پلیٹ فارم نمبر 2 کے قریب واقع ٹو وہیلر پارکنگ ایریا میں کھڑی 200 سے زائد موٹر سائیکلیں اور اسکوٹیاں جل کر مکمل طور پر راکھ ہو گئیں۔ آگ کی شدت اتنی زیادہ تھی کہ آر پی ایف اور جی آر پی کے اہلکار بھی فوری طور پر صورتحال پر قابو نہ پا سکے، جس سے مسافروں اور قریبی رہائشیوں میں خوف و ہراس پھیل گیا۔ابتدائی معلومات کے مطابق آگ صبح تقریباً 6:45 بجے  دیکھتے ہی دیکھتے شعلوں نے پورے پارکنگ ایریا کو اپنی لپیٹ میں لے لیا، جہاں روزانہ 500 سے زائد دو پہیہ گاڑیاں کھڑی کی جاتی ہیں۔ امکان ظاہر کیا جا رہا ہے کہ گاڑیوں میں موجود ایندھن کی وجہ سے آگ تیزی سے پھیلی اور چند ہی منٹوں میں بڑے پیمانے پر نقصان ہو گیا۔ اطلاع ملتے ہی فائر اینڈ ریسکیو سروس کی ٹیمیں فوری طور پر موقع پر پہنچ گئیں۔

آگ بجھانے میں فائر فائٹرز کو سخت جدوجہد
آگ پر قابو پانے کے لیے کئی فائر ٹینڈر تعینات کیے گئے۔ فائر فائٹرز نے تقریباً آدھے گھنٹے کی مسلسل کوشش کے بعد شعلوں کو بجھایا۔ اگرچہ آگ پر قابو پا لیا گیا، لیکن کچھ دیر تک علاقے میں گھنا دھواں چھایا رہا، جس سے مسافروں اور اسٹیشن کے عملے کو مشکلات کا سامنا کرنا پڑا۔ عینی شاہدین کے مطابق کئی گاڑیاں مکمل طور پر جل گئیں جبکہ بعض کو جزوی نقصان پہنچا۔پارکنگ میں کھڑی زیادہ تر گاڑیاں روزانہ سفر کرنے والے مسافروں کی تھیں۔ جیسے ہی انہیں واقعے کی خبر ملی، وہ دوڑتے ہوئے موقع پر پہنچے، مگر اپنی گاڑیاں جل کر راکھ ہوتی دیکھ کر مایوسی کا شکار ہو گئے۔ تباہ شدہ گاڑیوں کی حتمی تعداد کا اندازہ لگایا جا رہا ہے۔

آگ لگنے کی اصل وجہ ابھی تک معلوم نہیں ہو سکی۔ حکام کے مطابق بجلی کے شارٹ سرکٹ، ایندھن کے اخراج یا کسی اور وجہ سے آگ لگنے کے پہلوؤں کی تفصیلی جانچ کی جائے گی۔ اس معاملے میں ریلوے اسٹیشن کے سی سی ٹی وی فوٹیج کو بھی کھنگالا جائے گا۔ ریلوے حکام نے واضح کیا ہے کہ اس واقعے سے ٹرین سروس متاثر نہیں ہوئی اور ٹرینوں کی آمد و رفت معمول کے مطابق جاری رہی۔ متاثرہ گاڑی مالکان کو یقین دلایا گیا ہے کہ تحقیقات مکمل ہونے کے بعد ضروری اقدامات کیے جائیں گے۔

بھارت ایکسپریس اردو