Maharashtra Loan Waiver: مہاراشٹر کے کسانوں کے لئے بڑی خوشخبری! دیویندر فڑنویس حکومت نے 2 لاکھ روپئے تک کی قرض معافی کو دی منظوری

مہاراشٹرکے کسانوں کے لئے بڑی خوشخبری ہے۔ کابینہ نے 2 لاکھ تک کے کسان قرض معافی کومنظوری دے دی ہے۔ دیویندرفڑنویس کی قیادت والی حکومت کے اس فیصلے سے 56 لاکھ کسانوں کوفائدہ ملے گا۔ کسانوں کی قرض معافی کی کل رقم 36,585 کروڑروپئے ہے۔ حالانکہ قرض معافی کومنظوری ضرورمل گئی ہے، لیکن قانون سازکونسل کے انتخابات (ایم ایل سی) کے پیش نظرضابطہ اخلاق کی وجہ سے اس کا اعلان نہیں کیا گیا ہے۔

یہ فیصلہ وزیراعلیٰ دیویندرفڑنویس کی صدارت میں مانسون سیزن سے قبل کابینہ کی میٹنگ میں کیا گیا۔ 2024 کے اسمبلی انتخابات سے قبل بی جے پی کی قیادت والے”مہایتی” اتحاد کے کلیدی وعدوں میں کسانوں کے قرض کی معافی تھی۔

اسکیم کے دائرے میں آئیں گے 65 لاکھ سے زیادہ قرض ہولڈرز

ذرائع نے بتایا کہ قانون سازکونسل (ایم ایل سی) کے انتخابات کے لیے ضابطہ اخلاق کی وجہ سے فوری طورپرباضابطہ اعلان نہیں کیا جائے گا۔ اس اسکیم میں 6.5 ملین سے زیادہ قرض کھاتوں کا احاطہ کیا جائے گا اورتقریباً 5.6 ملین کسانوں کے لئے 36,585 کروڑروپئے کے زرعی قرضے معاف کئے جانے کی امید ہے۔ کابینہ نے ان کسانوں کو50,000 روپئے تک کی مراعات دینے کا بھی فیصلہ کیا، جوباقاعدگی سے اپنے زرعی قرضوں کی ادائیگی کرتے ہیں۔

نیشنل بینک کو دی گئی یہ بڑی ہدایت

واضح رہے کہ 21 مئی کوخریف سیزن کی تیاریوں کا جائزہ لینے اورریاستی سطح کے بینکرس کمیٹی کے ساتھ میٹنگ کرنے کے بعد وزیراعلی دیویندرفڑنویس نے اعلان کیا کہ تمام اہل کسانوں کو30 جون سے پہلے ان کے قرض کی معافی مل جائے گی۔ انہوں نے مزید کہا کہ اس بروقت نفاذ سے کسانوں کے لئے آئندہ زرعی سیزن کے لیے نئے قرضے حاصل کرنے کی راہ ہموارہوگی۔ وزیراعلیٰ نے قومی بینکوں کوہدایت کی کہ وہ اپنے مقررہ زرعی قرضوں کی تقسیم کے اہداف کا کم ازکم 80 فیصد سختی سے حاصل کریں۔ ریاستی حکومت نے پہلے قرض معافی کی اسکیم کا اعلان کیا تھا، لیکن نافذ کرنے کی مخصوص تاریخ کی کمی نے کسانوں اوربینکنگ اداروں دونوں میں کافی الجھن پیدا کردی تھی۔

 بھارت ایکسپریس اردو-