Rahul Gandhi Election Campaign: راہل گاندھی نے 100 سے زیادہ ریلیاں اور عوامی رابطہ مہم چلائی، کھڑگے نے دیئے 50 انٹرویوز

نئی دہلی: لوک سبھا انتخابات کے ساتویں اور آخری مرحلے کی مہم جمعرات کے روز ختم ہوگئی۔ ساتویں اور آخری مرحلے کے لیے ووٹنگ یکم جون کو ہونی ہے۔ انتخابات کے نتائج کا اعلان 4 جون کو کیا جائے گا۔

انتخابات میں تمام سیاسی جماعتوں نے عوام کو اپنی طرف متوجہ کرنے کے لیے کئی بڑی ریلیاں، انتخابی مہم اور روڈ شوز کا انعقاد کیا۔ الیکشن کمیشن نے 16 مارچ کو لوک سبھا انتخابات کی تاریخوں کا اعلان کیا تھا۔ جس کے بعد ملک بھر میں ضابطہ اخلاق نافذ کر دیا گیا۔ کانگریس پارٹی نے سات مرحلوں میں ہونے والی انتخابی مہم میں اپنی پوری طاقت لگانے کی کوشش کی۔

16 مارچ سے 30 مئی تک 75 دنوں کے دوران کانگریس کے رکن پارلیمنٹ راہل گاندھی نے انتخابی ریلیوں، روڈ شوز، نیائے یاترا اور دیگر پروگراموں کے ذریعے عوام سے رابطہ قائم کیا۔ کانگریس پارٹی کے مطابق راہل گاندھی نے 75 دنوں کے دوران تقریباً 107 انتخابی ریلیوں سے خطاب کیا۔

اس کے علاوہ کانگریس صدر ملکارجن کھڑگے نے لوک سبھا انتخابی مہم کے دوران 100 سے زیادہ عوامی ریلیاں کیں۔ اس کے ساتھ اس مدت کے دوران انہوں نے 20 سے زائد پریس کانفرنسز اور 50 سے زائد مختلف چینلوں کو انٹرویوز بھی دیئے۔

کانگریس پارٹی کے مطابق اس 55 روزہ انتخابی مہم میں پرینکا گاندھی واڈرا نے 108 عوامی جلسوں اور روڈ شوز میں حصہ لیا۔ انہوں نے امیٹھی اور رائے بریلی میں ہزاروں کارکنوں کی دو کانفرنسوں سے بھی خطاب کیا۔ انتخابی مہم کے دوران پرینکا نے 100 سے زیادہ میڈیا بائٹس، 5 پرنٹ میڈیا انٹرویو، 1 ٹی وی انٹرویو بھی دیا۔

آپ کو بتاتے چلیں کہ اس بار لوک سبھا انتخابات میں کانگریس پارٹی کا اہم مدعا اپرنٹس شپ پروگرام کے تحت غریب خاندانوں کی خواتین اور نوجوانوں کو سالانہ ایک لاکھ روپے کی مالی امداد فراہم کرنا ہے۔ اس بار کانگریس کے رکن پارلیمنٹ راہل گاندھی کیرلا کے وائناڈ اور اتر پردیش کی رائے بریلی سیٹ سے الیکشن لڑ رہے ہیں۔

یہ بھی پڑھیں: جھارکھنڈ میں انتخابی مہم کے دوران ‘انڈیا’ اتحاد کا سب سے بڑا چہرہ بن کر ابھریں کلپنا سورین، جانئے کیسا رہا ان کا سیاسی کمپین

بتا دیں کہ ساتویں اور آخری مرحلے میں یکم جون کو 8 ریاستوں اور مرکز کے زیر انتظام علاقے کی 57 لوک سبھا سیٹوں پر ووٹنگ ہوگی، جس میں پنجاب کی 13، اتر پردیش کی 13، اوڈیشہ کی 6، بہار کی 8، مغربی بنگال کی 9، ہماچل پردیش میں 4، جھارکھنڈ میں 3 اور چنڈی گڑھ کی ایک سیٹ پر ووٹنگ ہوگی۔

بھارت ایکسپریس۔