Language is the soul of a nation: زبان قوم کی روح ہے، صرف اظہارِ خیال کا ذریعہ نہیں — وزیر داخلہ امت شاہ نے زبانوں کو زندہ رکھنے کی ضرورت پر دیا زور

نئی دہلی: مرکزی وزیر داخلہ امت شاہ نے جمعرات کو کہا کہ زبانیں صرف رابطے کا ذریعہ نہیں بلکہ قوم کی روح ہوتی ہیں، اور ان کا تحفظ اور فروغ بے حد ضروری ہے۔ انہوں نے کہا: “جہاں تک ملک کا تعلق ہے، زبان صرف اظہارِ خیال کا ذریعہ نہیں، بلکہ یہ ایک قوم کی روح ہے۔ زبانوں کو زندہ رکھنا اور انھیں مالا مال کرنا بہت ضروری ہے۔ ہمیں آنے والے دنوں میں تمام بھارتی زبانوں، خصوصاً سرکاری زبان کے فروغ کے لیے بھرپور کوششیں کرنی چاہئیں۔”

کسی زبان کی مخالفت نہیں ہونی چاہیے

یہ بات انہوں نے دہلی میں سرکاری زبان ڈپارٹمنٹ کی گولڈن جوبلی تقریب سے خطاب کرتے ہوئے کہی۔ امت شاہ نے کہا کہ ہندی تمام بھارتی زبانوں کی دوست ہے، اور ہندی سمیت تمام ملکی زبانیں مل کر قوم کی خودداری کو بلند کرنے میں اہم کردار ادا کرسکتی ہیں۔ انہوں نے مزید کہا: “میں دل سے مانتا ہوں کہ ہندی کسی بھارتی زبان کی دشمن نہیں ہوسکتی۔ ہندی تمام بھارتی زبانوں کی دوست ہے، اور ہندی اور بھارتی زبانیں مل کر ہماری خودداری کے مشن کو حتمی منزل تک لے جا سکتی ہیں۔ کسی زبان کی مخالفت نہیں ہونی چاہیے، نہ ہی کسی غیر ملکی زبان کی۔ لیکن ہمیں اپنی زبان کو سربلند کرنے پر اصرار کرنا چاہیے، اپنی زبان بولنے پر اصرار ہونا چاہیے، اور اپنی زبان میں سوچنے پر بھی زور دینا چاہیے۔”

ہمیں غلامی کی ذہنیت سے آزاد ہونا چاہیے

انہوں نے اس بات پر زور دیا کہ قوم کو غلامانہ ذہنیت سے باہر نکلنا ہوگا۔ ہمیں غلامی کی ذہنیت سے آزاد ہونا چاہیے۔ جب تک کوئی شخص اپنی زبان پر فخر نہیں کرتا، اپنی زبان میں اظہار نہیں کرتا، تب تک ہم غلامی کی ذہنیت سے آزاد نہیں ہو سکتے…

بھارتی زبانوں کا مستقبل نہایت تابناک

انہوں نے مزید کہا۔ وزیر داخلہ نے حکومت کی ان کامیابیوں کا بھی ذکر کیا جن کے ذریعے طلباء کو مختلف بھارتی زبانوں میں مقابلہ جاتی امتحانات دینے کی سہولت دی گئی ہے۔ جے ای ای، نیٹ، سی یو ای ٹی جیسے امتحانات اب 13 زبانوں میں لیے جا رہے ہیں۔ پہلے سی اے پی ایف کانسٹیبل بھرتی کے لیے صرف انگریزی یا ہندی میں درخواست دی جا سکتی تھی۔ ہم نے یہ نظام لچکدار بنایا اور اب 13 زبانوں میں امتحان کی اجازت دی گئی ہے۔ آج مجھے خوشی ہے کہ 95 فیصد امیدوار اپنی مادری زبان میں کانسٹیبل کا امتحان دے رہے ہیں۔ یہ ظاہر کرتا ہے کہ بھارتی زبانوں کا مستقبل آنے والے دنوں میں کتنا تابناک ہے۔ اس موقع پر دہلی کی وزیر اعلیٰ ریکھا گپتا بھی موجود تھیں۔

بھارت ایکسپریس اردو۔