All India Weather Update: بس دو دن اور، دہلی-این سی آر کو شدید گرمی سے ملے گی راحت، ملک بھر میں موسم کا بدلے گا مزاج

نئی دہلی: ملک بھر میں موسم اس وقت دو مختلف رخ اختیار کیے ہوئے ہے۔ ایک جانب شمالی ہند کے میدانی علاقے شدید گرمی اور لو کی لپیٹ میں ہیں، جب کہ دوسری جانب جنوبی اور شمال مشرقی ریاستوں میں مانسون کی بارشوں نے موسم کو خوشگوار بنا دیا ہے۔ محکمہ موسمیات کے مطابق آئندہ چند روز کے دوران مانسون مزید علاقوں میں پیش قدمی کرے گا، جس سے کئی ریاستوں میں بارشوں کا سلسلہ تیز ہونے کا امکان ہے۔بھارتی محکمہ موسمیات (آئی ایم ڈی) کے مطابق جنوب مغربی مانسون تیزی سے آگے بڑھ رہا ہے اور تریپورہ، میزورم، ناگالینڈ، منی پور، آسام اور اروناچل پردیش کے کئی حصوں تک پہنچ چکا ہے۔ ماہرین کا کہنا ہے کہ اگلے دو سے تین دنوں میں مانسون چھتیس گڑھ، اڈیشہ، مغربی بنگال، سکم اور شمال مشرقی خطے کے باقی علاقوں کو بھی اپنی لپیٹ میں لے لے گا۔

دہلی، نوئیڈا، غازی آباد، گروگرام اور گریٹر نوئیڈا سمیت پورے این سی آر میں فی الحال شدید گرمی کا راج برقرار رہے گا۔ محکمہ موسمیات کے مطابق 10 جون تک درجہ حرارت 43 ڈگری سیلسیس تک پہنچ سکتا ہے جبکہ کم سے کم درجہ حرارت 28 سے 29 ڈگری کے درمیان رہنے کا امکان ہے۔ دوپہر کے اوقات میں گرم ہوائیں عوام کو مزید پریشان کریں گی۔ تاہم شہریوں کے لیے اچھی خبر یہ ہے کہ 11 جون سے ایک نیا مغربی سلسلہ اثر انداز ہوگا جس کے باعث موسم میں نمایاں تبدیلی متوقع ہے۔ 11 جون کو گرج چمک کے ساتھ بارش شروع ہو سکتی ہے جب کہ 12 اور 13 جون کو تیز آندھی اور موسلا دھار بارش کا امکان ظاہر کیا گیا ہے۔ اس دوران درجہ حرارت کم ہو کر تقریباً 36 ڈگری تک پہنچ سکتا ہے، جس سے شدید گرمی سے بڑی راحت ملے گی۔

اتر پردیش میں بھی گرمی کی شدت برقرار ہے۔ کانپور، پریاگ راج اور وارانسی میں درجہ حرارت 45 ڈگری سیلسیس تک پہنچنے کا امکان ہے، جبکہ باندا میں 44 اور آگرہ، علی گڑھ اور لکھنؤ میں 43 ڈگری کے آس پاس رہنے کی پیش گوئی کی گئی ہے۔ عوام کو دوپہر کے اوقات میں غیر ضروری طور پر گھروں سے باہر نہ نکلنے کی ہدایت دی گئی ہے۔مدھیہ پردیش میں مانسون کی آمد کے ساتھ موسم نے کروٹ لینا شروع کر دی ہے۔ ہردا، سیہور، دیواس، کھنڈوا اور اوم کاریشور سمیت کئی اضلاع میں تیز آندھی، گرج چمک اور بارش کا الرٹ جاری کیا گیا ہے۔ بعض مقامات پر ہوا کی رفتار 60 کلومیٹر فی گھنٹہ تک پہنچ سکتی ہے۔

راجستھان میں موسم دو مختلف شکلیں اختیار کیے ہوئے ہے۔ سری گنگا نگر حالیہ دنوں میں ملک کا سب سے گرم شہر ریکارڈ کیا گیا، جب کہ جیسلمیر، بیکانیر، باڑمیر اور چورو سمیت کئی اضلاع میں شدید لو کی وارننگ جاری ہے۔ دوسری طرف جنوبی ہند کی ریاستوں، خصوصاً کیرالہ، کرناٹک، تمل ناڈو اور پڈوچیری میں موسلا دھار بارشوں کا سلسلہ جاری ہے، جس سے موسم خوشگوار ہو گیا ہے اور درجہ حرارت میں کمی ریکارڈ کی جا رہی ہے۔

بھارت ایکسپریس اردو