میرٹھ میں سڑک پرعید کی نمازادا کرنے پرلگائی گئی پابندی، خلاف ورزی کی صورت میں مکہ-مدینہ کا بھی نہیں کرپائیں گے سفر، جینت چودھری نے پولیس پراٹھایا سوال

اترپردیش کے میرٹھ میں عیدالفطر2025 سے متعلق سخت اقدامات کئے جا رہے ہیں۔ میرٹھ پولیس نے عیدالفطرکے لئے ایک فرمان جاری کیا ہے۔ اس فرمان میں کہا گیا ہے کہ عیدالفطر کی نمازسڑکوں پرادا نہیں کی جائے گی۔ ایسا کرنے والوں کے خلاف قانونی کارروائی ہوگی اور ان کے پاسپورٹ بھی منسوخ ہوجائیں گے۔ میرٹھ پولیس کے اس فرمان پرمرکزی وزیرجینت چودھری کا بیان سامنے آیا ہے۔

انہوں نے کہا ہے کہ آرویلین 1984 کی طرف پولیسنگ۔ جینت چودھری کے اس ٹوئٹ کا مطلب یہی ہے کہ وہ میرٹھ پولیس کے اس فرمان کے بالکل خلاف ہیں اوروہ یہ کہنے کی کوشش کررہے ہیں کہ موجودہ پولیسنگ یا لاء اینڈ آرڈرویسا ہی ہوگیا ہے جیسا کہ جارج آرویل کی کہانی 1984 میں بتائی گئی ہے، جس میں ایک آمرانہ حکومت ہے، جو عوام کی ہرسرگرمی پرنظررکھتی ہے اوران کی آزادی کو محدود کرنے کی کوشش کرتی ہے۔

سڑکوں پرنہیں اداکی جائے گی عید کی نماز

میرٹھ میں عید الفطر2025 کے لئے جوفرمان جاری کیا گیا ہے، اس سے متعلق شہرایس پی آیوش وکرم سنگھ نے کہا ہے کہ اس سال عید کی نماز نزدیکی مسجدوں اورفیض عام انٹرکالج جیسے طے مقامات پرہی ادا کی جائے گی۔ عید گاہ کے آس پاس یا سڑکوں پرنہیں ادا کی جائے گی۔ خلاف ورزی کرنے والوں کے خلاف سخت کارروائی کی جائے گی۔ پولیس کا کہنا ہے کہ سیکورٹی کودھیان میں رکھتے ہوئے یہ فیصلہ کیا گیا ہے۔

عیدگاہ جیسے مقامات پرسیکورٹی اہلکاروں کی تعیناتی