Japanese PM Sanae Takaichi Arrives: جاپانی وزیر اعظم سانے تاکائیچی کا پہلا دورۂ بھارت، وزیر اعظم نریندر مودی نے کیا پُرتپاک استقبال

بھارت اور جاپان کے تعلقات کو مزید مضبوط بنانے کی سمت میں جاپان کی وزیر اعظم سانے تاکائیچی اپنے پہلے تین روزہ سرکاری دورے پر نئی دہلی پہنچ گئیں، جہاں وزیر اعظم نریندر مودی نے ان کا گرمجوشی سے استقبال کیا۔ وزیر اعظم مودی نے اس دورے کو دونوں ممالک کے درمیان اسٹریٹجک شراکت داری کو نئی بلندیوں تک لے جانے کا اہم موقع قرار دیتے ہوئے امید ظاہر کی کہ بھارت اور جاپان کی مشترکہ کوششیں ہند-بحرالکاہل (انڈو پیسیفک) خطے سمیت پوری دنیا میں امن، استحکام اور خوشحالی کے فروغ میں اہم کردار ادا کریں گی۔

وزیر اعظم مودی کا ’ایکس‘ پر پیغام

وزیر اعظم نریندر مودی نے سوشل میڈیا پلیٹ فارم ایکس (X) پر لکھا، ’’وزیر اعظم سانے تاکائیچی، بھارت میں آپ کا دل کی گہرائیوں سے خیرمقدم ہے۔ آپ کے پہلے دورۂ بھارت پر آپ کی میزبانی ہمارے لیے باعثِ مسرت ہے۔ مجھے جمعرات کو ہونے والی ہماری تفصیلی ملاقات کا انتظار ہے، جو بھارت اور جاپان کے درمیان خصوصی اسٹریٹجک اور عالمی شراکت داری کو مزید مضبوط بنائے گی۔‘‘انہوں نے مزید کہا کہ دونوں ممالک کی مشترکہ کوششیں ہند-بحرالکاہل اور دیگر خطوں میں امن، استحکام اور خوشحالی کے فروغ کو مزید تقویت دیں گی۔

سانے تاکائیچی کا پہلا دورۂ بھارت

جاپانی وزیر اعظم سانے تاکائیچی نے بھی بھارت پہنچنے پر خوشی کا اظہار کرتے ہوئے کہا کہ وزیر اعظم نریندر مودی کے ساتھ ہونے والی ملاقات میں معاشی سلامتی، توانائی کے تحفظ اور دیگر اہم عالمی و علاقائی امور پر تبادلۂ خیال کیا جائے گا۔انہوں نے ایکس پر اپنے پیغام میں لکھا،’’میں بھارت کی دارالحکومت نئی دہلی پہنچ گئی ہوں۔ جاپان کی وزیر اعظم کی حیثیت سے یہ تقریباً تین برس بعد میرا پہلا دورۂ بھارت ہے، جبکہ ذاتی طور پر بھی یہ میرا بھارت کا پہلا سفر ہے۔‘‘انہوں نے مزید کہا کہ موجودہ عالمی حالات کے پیشِ نظر جاپان اور بھارت کے درمیان اسٹریٹجک تعاون کو مزید گہرا کرنا، ایک دوسرے کی تکمیلی صلاحیتوں سے فائدہ اٹھانا اور جاپان-بھارت خصوصی اسٹریٹجک عالمی شراکت داری کو مزید مستحکم بنانا اس دورے کا بنیادی مقصد ہے۔

سیمی کنڈکٹر، اے آئی اور دفاعی تعاون پر خصوصی توجہ

تین روزہ دورے کے دوران سانے تاکائیچی اور وزیر اعظم مودی کے درمیان اعلیٰ سطحی دوطرفہ مذاکرات ہوں گے۔ دونوں لیڈر 16ویں بھارت-جاپان سالانہ سربراہی اجلاس میں بھی شرکت کریں گے، جہاں تجارت، سرمایہ کاری، دفاع، سیمی کنڈکٹر، مصنوعی ذہانت (اے آئی)، آٹوموبائل صنعت، سپلائی چین اور ہند-بحرالکاہل خطے کی سلامتی سمیت متعدد اہم موضوعات پر تفصیلی گفتگو ہوگی۔جاپانی وزیر اعظم نے اس اعتماد کا اظہار کیا کہ ان کے اس دورے سے دونوں ممالک کے درمیان اقتصادی، صنعتی اور اسٹریٹجک تعاون کو نئی رفتار ملے گی، جبکہ سرکاری اور نجی شعبوں کی مشترکہ شراکت کے ذریعے ایک مضبوط، پائیدار اور طویل مدتی اقتصادی تعلقات کی بنیاد مزید مستحکم ہوگی۔

بھارت ایکسپریس اردو۔