Jammu Kashmir Election 2024 : جموں کشمیر میں ٹوٹ سکتا ہے ووٹنگ کا ریکارڈ، تین بجے تک 50 فیصد سے زیادہ ہوچکی ہے ووٹنگ،70فیصد ووٹنگ کے ساتھ کشتواڑ آگے

جموں و کشمیر اسمبلی انتخابات کے لیے ووٹنگ آج (18 ستمبر) صبح 7 بجے سے جاری ہے۔ جموں و کشمیر کی 24 سیٹوں پر آج ووٹنگ ہو رہی ہےحالانکہ جموں کشمیر میں کل 90 اسمبلی سیٹیں ہیں۔آج صبح سات بجے جب ووٹنگ کا آغاز ہوا تب سے ہی لمبی لمبی قطاریں دیکھنے کو  مل رہی ہیں جو اپنے آپ میں خوش آئند ہے اور لوگ یہ اظہار بھی کررہے ہیں کہ وہ جمہوریت میں یقین رکھتے ہیں حریت پسندوں میں نہیں ۔

صبح سے ووٹنگ کی رفتار مسلسل بڑھتی چلی جارہی ہے اور اسی کا نتیجہ ہے کہ تین بجے تک 50.65 فیصد ووٹنگ ہوئی ہے۔ اگر بات صوبائی سطح کی ہوتو جموں صوبے میں ووٹنگ اب بھی کشمیر زون سے زیادہ ہے۔ جموں صوبے میں کشتواڑ سب سے آگے ہے جہاں 70 فیصد ووٹنگ ہوچکی ہے، وہیں ڈوڈہ اور رامبن میں قریب 60 فیصد ووٹنگ ہوچکی ہے، شوپیاں میں 46.84 فیصد اور پلوامہ میں 36.90 فیصد ووٹنگ ہوئی ہے۔ اگر بات کشمیر صوبے کی کی جائے تو کشمیر کے کولگام میں سب سے زیادہ ووٹنگ ہوئی ہے ،وہاں تین بجے تک 50 فیصد سے زیادہ ووٹنگ ہوچکی ہے،اننت ناگ میں بھی قریب قریب پچاس فیصد ووٹنگ ہوچکی ہے،وہاں اب تک 46.67 فیصد ووٹ ڈالے جاچکے ہیں اور ابھی بھی دونوں صوبوں کے بیشتر پولنگ بوتھ پر لوگوں کی قطاریں نظرآرہی ہیں۔

ووٹ ڈالتے وقت یاد رکھیں دھوکہ کس نے دیا:کھرگے

کانگریس کے صدر ملکارجن کھرگے نے جموں و کشمیر کے ووٹروں پر زور دیا کہ وہ یہ جب ووٹ ڈال رہے ہوں تب یہ یاد رکھیں کہ جموں کشمیر  ریاست کو یونین ٹیریٹری میں بدلنے کی “غلطی” کے لئے کون ذمہ دار ہے۔کھرگے نے زور دے کر کہا کہ جموں و کشمیر کے لوگ اپنے حقوق کے تحفظ اور حقیقی ترقی اور مکمل ریاست کے نئے دور کا آغاز کرنے کے لیے بے چین ہیں۔ایکس پر ایک پوسٹ میں، کھرگے نے کہا،چونکہ  24 اسمبلی حلقوں میں ووٹنگ کا پہلا مرحلہ شروع ہو چکا ہے،اس لئے  ہم ہر ایک سے اپنے جمہوری حق کا استعمال کرنے اور بڑی تعداد میں ووٹ ڈالنے کی اپیل کرتے ہیں۔

کانگریس صدر نے کہا کہ ہر ایک ووٹ میں مستقبل کو تشکیل دینے اور امن، استحکام، انصاف، ترقی اور اقتصادی طور پر بااختیار بنانے کی طاقت ہے۔انہوں نے کہا کہ ہم سب سے، خاص طور پر پہلی بار ووٹ دینے والوں سے اپیل کرتے ہیں کہ وہ اس اہم الیکشن میں حصہ لیں اور تبدیلی کے لیے  حصہ داربنیں۔کھرگے نے کہا، ’’پہلی بار کسی ریاست کو یونین ٹیریٹری میں گھٹا کر بدل دیا گیا، جب آپ اپنا ووٹ ڈالیں تو یاد رکھیں کہ اس غداری کے لیے کون ذمہ دار ہے،انہوں نے مزید کہا کہ ہم متحد ہوں اور جموں و کشمیر کے لیے ایک روشن مستقبل کی تشکیل کریں، جہاں تمام شہریوں کی آواز سنی جاتی ہو۔

این سی کو بڑی تعداد میں ووٹ مل رہے ہیں – عمر عبداللہ

نیشنل کانفرنس کے نائب صدر عمر عبداللہ نے کہا، “ہم چاہتے ہیں کہ لوگ انتخابات میں حصہ لیں۔ نیشنل کانفرنس کو ہر علاقے میں بھاری تعداد میں ووٹ مل رہے ہیں اور ہم کامیابی کے لیے پرامید ہیں۔ اس الیکشن میں بہت سے مسائل ہیں، لوگ اپنے گھروں سے باہر آئیں۔ اور اپنے ووٹ کا استعمال سمجھداری سے کریں۔”

بے خوف ہو کر ووٹ دیں’- کشتواڑ ڈی ایم

کشتواڑ کے ڈپٹی کمشنر اور ڈی ایم راجیش کمار شاون نے کہا، “سکیورٹی کے وسیع انتظامات کیے گئے ہیں۔ نیم فوجی دستوں کو تعینات کیا گیا ہے۔ لوگ بے خوف ہو کر آئیں اور اپنا ووٹ ڈالیں۔ کنٹرول روم سے ہر چیز کی نگرانی کی جا رہی ہے۔اس لئے ڈرنے کی قطعی ضرورت نہیں ہے۔ بے خوف ہوکر ووٹ ڈالنے کیلئے گھروں سے نکلیں۔

بھارت ایکسپریس۔