Jamia Hamdard’s Mission for a Clean Campus: ’’تبدیلی کا آغاز خود سے کریں‘‘: جامعہ ہمدرد کا صاف، تمباکو سے پاک اور پلاسٹک سے پاک کیمپس کی جانب اہم قدم

نئی دہلی: ماحولیاتی شعور اور شہری ذمے داری کو فروغ دینے کی جانب ایک اہم قدم اٹھاتے ہوئے جامعہ ہمدرد نے اپنے وسیع تر مشن گرین کیمپس اقدام کے تحت صفائی مہم کا آغاز کیا ہے۔ یہ مہم رجسٹرار کرنل طاہر مصطفیٰ کی قیادت میں، ڈاکٹر جاوید احمد (کوآرڈینیٹر این ایس ایس)، ڈاکٹر محمد انظار عالم (ڈپٹی این ایس ایس کوآرڈینیٹر، جامعہ ہمدرد)، فیکلٹی اراکین، طلبہ اور این ایس ایس رضاکاروں کی بھرپور شرکت سے جاری ہے۔ اس مہم کا مقصد کیمپس کو تمباکو نوشی سے پاک، کوڑا کرکٹ سے پاک اور پلاسٹک سے پاک بنانا ہے، تاکہ طلبہ، اساتذہ اور عملے میں مشترکہ ذمے داری کا احساس بیدار ہو اور وہ اپنی روزمرہ زندگی میں پائیدار اور ماحول دوست طریقے اپنائیں۔

صحت مندی ہمدرد کے فلسفے کا مرکزی جز

اس موقع پر کرنل طاہر مصطفیٰ نے صفائی اور حفظان صحت کی اہمیت پر زور دیتے ہوئے کہا: ’’ہمیں دوسروں یا سرکاری اداروں کا انتظار نہیں کرنا چاہیے کہ وہ ہمارے گرد و نواح کو صاف کریں۔ بحیثیت ذمہ دار شہری، یہ ہماری ذمے داری ہے کہ ہم ایک صاف اور صحت مند ماحول کو برقرار رکھیں۔ صفائی ایک وقتی عمل نہیں بلکہ ایک مستقل عادت ہونی چاہیے۔‘‘ انہوں نے مزید کہا کہ صحت مندی ہمیشہ سے ہمدرد کے فلسفے کا مرکزی جز رہی ہے، جو بانی جامعہ حکیم عبد الحمید صاحب کے وژن کا عکاس ہے۔

ماحول کے تحفظ سے متعلق آگاہی

مہم کے دوران رضاکاروں نے کیمپس کے مختلف حصوں کی صفائی کی، کچرا اکٹھا کیا اور ماحول کے تحفظ سے متعلق آگاہی پیدا کی۔ طلبہ نے پلاسٹک کے استعمال میں کمی اور ماحول دوست متبادل اپنانے کا عہد بھی کیا۔ یہ مہم جامعہ ہمدرد کے ایک صحت مند، سرسبز اور پائیدار کیمپس کے عزم کی مظہر ہے۔ یہ پیغام نہ صرف جامعہ کی حدود میں محدود ہے بلکہ دہلی اور پورے ملک میں عوام کو یہ تحریک دیتا ہے کہ وہ اپنے ماحول کی ذمے داری خود لیں اور مثبت تبدیلی کے سفیر بنیں۔ جامعہ ہمدرد کی یہ صفائی مہم اس بات کی روشن مثال ہے کہ تعلیمی ادارے کس طرح ایک صاف، سرسبز اور ذمے دار بھارت کی تعمیر میں پیش قدمی کر سکتے ہیں۔

بھارت ایکسپریس اردو۔