Iran-Israel War: ایران۔اسرائیل کشیدگی کے باعث دبئی میں پھنس گئے پونے کے 84 بھارتی طلبہ، فضائی حدود بند ہونے سے بحران

پونے: مشرق وسطیٰ میں ایران اور اسرائیل کے درمیان بڑھتی ہوئی جنگی کشیدگی کے دوران مہاراشٹر کے شہر پونے سے تعلق رکھنے والے ایم بی اے کے 84 بھارتی طلبہ دبئی میں پھنس گئے ہیں۔ اطلاعات کے مطابق ایران کی جانب سے کیے گئے فضائی حملوں کے بعد سیکیورٹی خدشات کے پیش نظر دبئی کی فضائی حدود عارضی طور پر بند کر دی گئی، جس کے باعث طلبہ کی وطن واپسی ممکن نہ ہو سکی۔ یہ تمام طلبہ پونے کے معروف تعلیمی ادارے اندرا اسکول آف بزنس اسٹڈیز سے تعلق رکھتے ہیں اور سالانہ تعلیمی مطالعاتی دورے کے تحت پانچ روزہ پروگرام میں شرکت کے لیے دبئی گئے تھے۔ ادارے کے حکام کے مطابق 40 طلبہ کو ہفتہ کے روز بھارت واپس آنا تھا جبکہ باقی 44 طلبہ و طالبات کی واپسی اتوار کو طے تھی، تاہم خطے میں اچانک پیدا ہونے والی جنگی صورتحال نے تمام پروازیں متاثر کر دیں۔

ادارے کے ڈین جناردن پوار نے بتایا کہ طلبہ میں 42 لڑکے اور 42 لڑکیاں شامل ہیں اور تمام کو احتیاطی تدابیر کے تحت ایک محفوظ ہوٹل میں منتقل کر دیا گیا ہے۔ انہوں نے یقین دہانی کرائی کہ کسی بھی طالب علم یا اسٹاف رکن کو کوئی نقصان نہیں پہنچا اور سب محفوظ ہیں۔ کالج انتظامیہ مسلسل طلبہ اور مقامی حکام کے ساتھ رابطے میں ہے تاکہ جلد از جلد ان کی واپسی ممکن بنائی جا سکے۔ ادھر اندرا گروپ آف انسٹی ٹیوٹس کی چیئرپرسن تاریتا شنکر نے بتایا کہ طلبہ کے ساتھ تعلیمی اسٹاف بھی موجود ہے اور سب کی حفاظت اولین ترجیح ہے۔ ان کے مطابق بھارتی وزارت خارجہ اور شہری ہوا بازی کے حکام کے ساتھ مسلسل رابطہ قائم رکھا جا رہا ہے اور متبادل پروازوں کے انتظام پر غور جاری ہے۔

مشرق وسطیٰ میں جاری کشیدگی اس وقت مزید شدت اختیار کر گئی جب ایران کے سپریم لیڈر آیت اللہ علی خامنہ ای کی ہلاکت کی خبر ایرانی سرکاری میڈیا کی جانب سے جاری کی گئی۔ اس واقعے کے بعد خطے میں سیکیورٹی خدشات بڑھ گئے اور کئی ممالک نے احتیاطی طور پر اپنی فضائی حدود بند یا محدود کر دیں، جس سے بین الاقوامی پروازوں کا نظام بری طرح متاثر ہوا۔

عینی شاہدین کے مطابق دبئی میں بھی فضائی حملوں کے خدشے کے باعث دھماکوں جیسی آوازیں سنائی دینے کی اطلاعات موصول ہوئیں، جس کے بعد مسافروں میں خوف و ہراس پھیل گیا۔ متعدد بین الاقوامی ایئرلائنز نے اپنی پروازیں منسوخ یا موخر کر دی ہیں، جبکہ ہزاروں مسافر مختلف ہوائی اڈوں پر پھنسے ہوئے ہیں۔ بھارتی حکام کے مطابق صورتحال پر مسلسل نظر رکھی جا رہی ہے اور دبئی سمیت مغربی ایشیا کے مختلف ممالک میں موجود بھارتی شہریوں اور طلبہ کی بحفاظت واپسی کے لیے ہنگامی منصوبہ تیار کیا جا رہا ہے۔ ماہرین کا کہنا ہے کہ اگر خطے میں کشیدگی برقرار رہی تو عالمی فضائی سفر اور تجارتی سرگرمیوں پر اس کے اثرات مزید گہرے ہو سکتے ہیں۔

بھارت ایکسپریس اردو۔