Informing Pak was a crime: وزیر خارجہ کے بیان پر راہل گاندھی نے حکومت کو گھیرا، لگایا ملک مخالف ’جرم‘ کا الزام

لوک سبھا میں قائد حزب اختلاف راہل گاندھی نے آپریشن سندور کے ایک حصے کے طور پر دہشت گردی کے بنیادی ڈھانچے پر اپنے طے شدہ حملے سے پہلے پاکستان کو اس کی ’’اطلاع‘‘ دینے کے مرکزی حکومت کے فیصلے پر سوال اٹھایا اور کہا کہ یہ ایک ’’جرم‘‘ ہے۔ سوشل میڈیا پلیٹ فارم ’ایکس‘ پر ایک پوسٹ میں راہل گاندھی نے وزیرخارجہ ایس جے شنکر کی ایک ویڈیو شیئر کرتے ہوئے کہا کہ ہمارے وزیر خارجہ اس بات کا عوامی طور پر اعتراف کر رہے ہیں کہ ہم نے پاکستان کو اپنی کارروائی کی اطلاع دے دی تھی۔

راہل گاندھی نے ویڈیو شیئر کرتے ہوئے کیپشن میں لکھا ’’ہمارے حملے کے شروع میں ہی پاکستان کو مطلع کرنا ایک جرم تھا۔ EAM (وزیر خارجہ) نے عوامی طور پر اعتراف کیا ہے کہ حکومت ہند نے ایسا کیا ہے۔‘‘ کانگریس لیڈر راہل نے مزید سوال کیا کہ ’’اس کی اجازت کس نے دی؟ اس کے نتیجے میں ہماری فضائیہ نے کتنے طیارے کھوئے؟‘‘

وائرل ویڈیو میں کیا کہہ رہے ہیں وزیر خارجہ؟

راہل گاندھی نے جو ویڈیو شیئر کی ہے، اس میں وزیر خارجہ ایس جے شنکر کو یہ بولتے ہوئے سنا جا سکتا ہے کہ ’’آپریشن کے آغاز میں ہم نے پاکستان کو ایک پیغام بھیجا تھا، جس میں کہا گیا تھا کہ ہم دہشت گردوں کے بنیادی ڈھانچے پر حملہ کر رہے ہیں اور ہم فوج پر حملہ نہیں کر رہے ہیں۔ اس لیے پاک فوج کے پاس باہر کھڑے ہونے اور اس عمل میں مداخلت نہ کرنے کا آپشن ہے۔ لیکن انھوں نے ہمارا یہ اچھا مشورہ نہ لینے کا انتخاب کیا‘‘۔

وزیر خارجہ ایس جے شنکر کے اس بیان میں نئے سیاسی تنازعے کو جنم دیا ہے اور کانگریس اس کی بنیاد پر حکومت پر سوال اٹھا رہی ہے۔ سوشل میڈیا پر بھی اس ویڈیو نے کئی سوالات کو جنم دیا ہے۔ راہل گاندھی کے علاوہ اور بھی کئی لیڈران نے وزیر خارجہ کے اس بیان پر حیرانی کا اظہار کرتے ہوئے اس پر سوالات اٹھائے ہیں کہ آپریشن سندور شروع کرتے وقت پاکستان کو اس کی اطلاع کیوں دی گئی۔ اب تک وزیر خارجہ یا حکومت نے اس پر کسی ردعمل کا اظہار نہیں کیا ہے۔

بھارت ایکسپریس اردو