Nitish Kumar on Congres: لوک سبھا انتخاب سے قبل ’انڈیا اتحاد’انتشار کے دہانے پر،نتیش کمار نے کہا ،کانگریس کو نہیں ہے دلچسپی

بہار کے وزیر اعلی نتیش کمار نے جمعرات کو الزام لگایا کہ کانگریس سیٹوں کی تقسیم اور انڈیا اتحاد کو آگے لے جانے میں دلچسپی نہیں رکھتی ہے۔ ملک کی سب سے پرانی پارٹی پانچ ریاستوں کے اسمبلی انتخابات میں پوری طرح مصروف دکھائی دے رہی ہے۔ بہار جنتا دل یونائیٹڈ لیڈر نے کہا، “ہم 2024 کے لوک سبھا انتخابات کے لیے سیٹوں کی تقسیم پر کانگریس کے ساتھ بات چیت کر رہے تھے، لیکن ایسا لگتا ہے کہ پارٹی فی الحال پانچ ریاستوں میں اپنی انتخابی مہم کو سنبھالنے میں مصروف ہے۔”

انتخابات کے بعد سب کو دوبارہ بلایا جائے گا، نتیش کمار

کانگریس کو نشانہ بناتے ہوئے بہار کے وزیر اعلیٰ نے زور دے کر کہا کہ ’انڈیا اتحاد’ گہرے غور و خوض کے بعد بنایا گیا تھا، لیکن کانگریس پارٹی فی الحال اس اتحاد میں زیادہ دلچسپی نہیں رکھتی ہے۔ اس وقت پانچ ریاستوں میں انتخابات ہیں اور کانگریس پارٹی کی پوری توجہ اس وقت اسی پر ہے۔ انڈیا اتحاد کے حوالے سے فی الحال کوئی بات چیت نہیں ہوئی ہے۔ انتخابات کے بعد سب کو دوبارہ بلایا جائے گا۔

لوک سبھا انتخابات 2024 میں مرکز سے مودی حکومت کو بے دخل کرنے کے لیے دو درجن سے زیادہ اپوزیشن جماعتوں نے انڈیا الائنس تشکیل دیا۔ لیکن اب اتحاد کی گرہ ڈھیلی ہوتی دکھائی دے رہی ہے۔ لوک سبھا انتخابات میں صرف 6 ماہ رہ گئے ہیں، لیکن ابھی تک نہ تو سیٹوں کی تقسیم پر بات طے ہوئی ہے اور نہ ہی اپوزیشن کی طرف سے وزیر اعظم کے امیدوار کا فیصلہ کیا گیا ہے۔ نتیش قومی اسٹیج پر خود کو قائم کرنا چاہتے ہیں، لیکن اتحاد میں ان کی کامیابی اتنی اچھی نہیں ہے جتنی وہ چاہتے ہیں۔ تاہم، کانگریس صدر ملکارجن کھرگے نے بدھ کو کہا کہ پارٹی اسمبلی انتخابات کے بعد وزیر اعظم کے امیدوار کے بارے میں بات کرے گی۔ پانچ ریاستوں کے اسمبلی انتخابات کے بعد انڈیا اتحاد کی میٹنگ ہوگی، جس میں مختلف حکمت عملیوں پر تبادلہ خیال کیا جائے گا۔

آپ کو بتاتے چلیں کہ انڈیا الائنس کی طرف سے اب تک ایک بھی مشترکہ ریلی کا انعقاد نہیں کیا گیا ہے۔ اتحادیوں کے درمیان اختلافات کی خبریں آئے روز منظر عام پر آتی رہتی ہیں۔ حال ہی میں اکھلیش یادو نے کانگریس پر مدھیہ پردیش میں دھوکہ دہی کا الزام لگایا تھا۔ اس کے بعد ایس پی اور کانگریس لیڈروں کے درمیان لفظوں کی جنگ تیز ہوگئی۔