UP Lok Sabha Election Result 2024: اگر پرینکا گاندھی وارانسی سے الیکشن لڑتیں تو پی ایم مودی دو سے تین لاکھ ووٹوں سے ہار جاتے… راہل گاندھی کابڑا بیان

کانگریس لیڈر راہل گاندھی نے منگل کو لوک سبھا انتخابات کے نتائج کے متعلق ایک بڑا دعوی کیا ہے۔ انہوں نے کہا کہ اگر ان کی بہن پرینکا گاندھی واڈرا وارانسی سیٹ سے انتخاب لڑتیں تو وہ وزیر اعظم نریندر مودی کو بڑے فرق سے شکست دیتیں۔ راہل گاندھی نے رائے بریلی میں کہا کہ اگر پرینکا گاندھی وارانسی سے الیکشن لڑتیں تو آج ہندوستان کے وزیر اعظم وارانسی الیکشن دو سے تین لاکھ ووٹوں سے ہار جاتے۔ انہوں نے کہا، میں یہ غرور کے سبب نہیں کہہ رہا ہوں، میں یہ اس لیے کہہ رہا ہوں کہ ہندوستان کے لوگوں نے وزیر اعظم کو پیغام دیا ہے کہ ہمیں آپ کی سیاست پسند نہیں آئی اور ہم اس کے خلاف ہیں۔ ہم نفرت کے خلاف ہیں، تشدد کے خلاف ہیں۔

بھارتیہ جنتا پارٹی نے 2014 کے بعد اتر پردیش میں اپنی بدترین کارکردگی کا مظاہرہ کیا ہے۔ حال ہی میں ختم ہونے والے عام انتخابات میں بی جے پی نے 33 لوک سبھا سیٹیں جیتی ہیں، جو کہ سماج وادی پارٹی سے چار کم ہیں۔ وزیر اعظم نریندر مودی ابتدا میں وارانسی سیٹ پر کانگریس کے اجے رائے سے پیچھے تھے۔ آخر میں پی ایم نے سیٹ جیت لی۔

عوام کا شکریہ ادا کیا

انہوں نے کہا، میں کانگریس پارٹی کے تمام لیڈروں اور ممبران ، امیٹھی اور رائے بریلی کے لوگوں کا شکریہ ادا کرنا چاہتا ہوں جنہوں نے ہمیں جیت دلائی۔ اس بار کانگریس پارٹی امیٹھی، رائے بریلی، اتر پردیش اور پورے ملک میں متحد ہو کر لڑی۔ میں سماج وادی پارٹی کو بتانا چاہتا ہوں کہ اس بار آپ کے لیڈروں نے کانگریس لیڈروں کے ساتھ مل کر الیکشن لڑا ہے۔

کانگریس لیڈر نے کہا کہ آپ ( عوام) نے کشوری لال شرما کو امیٹھی میں، مجھے رائے بریلی میں اور اتر پردیش میں انڈیا اتحاد کے ممبران پارلیمنٹ کو جتوایا۔ آپ نے پورے ملک کی سیاست بدل کر رکھ دی ہے۔ عوام نے ملک کے وزیراعظم کو پیغام دیا ہے کہ اگر وہ آئین کو ہاتھ لگاتے ہیں تو دیکھیں عوام ان کا کیا حشر کریں گے۔

کانگریس کے رکن پارلیمنٹ نے کہا کہ آپ نے وہ تصویر دیکھی ہوگی کہ نریندر مودی آئین کو پیشانی کے قریب پکڑے ہوئے ہیں۔ ملک کے عوام نے یہ کام کرایا ہے۔ عوام نے ملک کے وزیراعظم کو پیغام دیا کہ آئین سے کھلواڑ کریں گے تو اچھا نہیں ہو گا۔ لوک سبھا انتخابات میں رائے بریلی حلقہ سے راہل گاندھی کی جیت کے بعد دونوں کانگریس لیڈروں کا رائے بریلی کا یہ پہلا دورہ ہے۔

بھارت ایکسپریس۔