I was offered support for PM’s post: نریندرمودی کو ہٹاکر پی ایم بننے کا نتن گڈکری کو ملا تھا آفر،اپوزیشن کی طرف سے آیا تھا فون،جانئے گڈکری نے کیا دیا تھا جواب

لوک سبھا انتخابات 2024 سے پہلے، بی جے پی لیڈر اور مرکزی وزیر نتن گڈکری کو اپوزیشن پارٹیوں کے کئی لیڈروں نے کیمپ تبدیل کرنے کا مشورہ دیا تھا۔ اب نتن گڈکری نے ایک اور چونکا دینے والا دعویٰ کیا ہے۔ انہوں نے ناگپور میں ایک تقریب میں بتایا کہ لوک سبھا انتخابات 2024 سے پہلے ایک سینئر اپوزیشن لیڈر نے انہیں وزیر اعظم کے عہدے کی پیشکش کی تھی لیکن انہوں نے اس پیشکش کو ٹھکرا دیا کیونکہ یہ ان کی سوچ کے خلاف تھا۔

ناگپور میں جرنلزم ایوارڈ پروگرام سے خطاب کرتے ہوئے نتن گڈکری نے کہا، ”ایک سینئر اپوزیشن لیڈر نے وزیر اعظم کے عہدے کی پیشکش کے ساتھ مجھ سے رابطہ کیا۔ مجھے بتایا گیا کہ اگر میں راضی ہو گیا تو وہ مجھے وزیر اعظم بنانے کے لیے کام کریں گے اور حمایت کریں گے۔ انہوں نے مزید کہا، “میں نے فوری طور پر اس پیشکش کو ٹھکرا دیا۔ میں نے اس لیڈر کو صاف کہہ دیا کہ میں نظریے پر یقین رکھنے والا شخص ہوں۔ میں نے ہمیشہ اصولوں پر کام کیا ہے اور اپنی زندگی ان کے مطابق گزاری ہے۔

 گڈکری نے مزید کہا کہ “میں نے واضح کر دیا کہ مجھے ملک کا وزیر اعظم بننے کی کبھی خواہش نہیں تھی۔ اس لیے کسی بھی پیشکش کو قبول کرنے کا سوال ہی پیدا نہیں ہوتا۔ میری پرورش اس طرح ہوئی ہے کہ میں کچھ اصولوں اور عقائد کے مطابق زندگی گزارتا ہوں جن پر سمجھوتہ نہیں کیا جا سکتا۔ رپورٹ کے مطابق اس دوران نتن گڈکری نے کسی اپوزیشن لیڈر کا نام یا دیگر تفصیلات شیئر نہیں کیں۔ ان کا یہ انکشاف خود بی جے پی کے کئی لیڈروں کے لیے چونکا دینے والا تھا۔نتن گڈکری کا شمار ان بی جے پی لیڈروں میں ہوتا ہے جن کی آر ایس ایس میں گہری جڑیں  ہیں لیکن ان کے ملک میں مخالف نظریات کے لیڈروں کے ساتھ بھی خوشگوار تعلقات ہیں۔ نتن گڈکری کے مہاراشٹر میں اپنے موجودہ حریف ادھو ٹھاکرے اور شرد پوار کے ساتھ بھی اچھے تعلقات ہیں۔ گڈکری کو کئی بار شرد پوار کے ساتھ مختلف سماجی پروگراموں میں اسٹیج شیئر کرتے دیکھا گیا ہے۔

بھارت ایکسپریس۔