BJP government will be formed in Bengal in 2026: ’بنگال میں 2026 میں بنے گی بی جے پی کی حکومت‘، وزیر داخلہ امت شاہ نے ممتا بنرجی کو دراندازی، بدعنوانی اور نقل مکانی پر آڑے ہاتھوں لیا

مرکزی وزیر داخلہ امت شاہ نے آج کولکاتا کے نیتا جی انڈور اسٹیڈیم میں بی جے پی کارکنان کی ایک خصوصی تنظیمی میٹنگ میں شرکت کی۔ اس دوران انہوں نے مغربی بنگال کی ترنمول کانگریس (ٹی ایم سی) حکومت اور وزیراعلیٰ ممتا بنرجی پر سخت حملہ کیا۔

امت شاہ نے 2026 کے اسمبلی انتخابات میں بی جے پی کی جیت کا دعویٰ کرتے ہوئے کہا: “بنگال کی عوام 2026 میں بی جے پی کی حکومت بنائے گی۔ دیدی، آپ کا وقت اب ختم ہو چکا ہے۔”

’آپریشن سندور‘ پر مرکزی وزیر داخلہ کا ممتا حکومت پر وار

شاہ نے ’آپریشن سندور‘ کے حوالے سے بھی ممتا بنرجی پر حملہ کیا۔ انہوں نے کہا کہ پہلگام دہشتگرد حملے پر ممتا نے خاموشی اختیار کر لی، لیکن جب بھارتی فوج نے اس کا بدلہ لیا، تو ٹی ایم سی کے رہنماؤں نے بے بنیاد تبصرے کر کے اس آپریشن کی توہین کی۔ شاہ نے کہا: “بنگال کی عوام کو ممتا بنرجی کو سندور کی طاقت دکھانی چاہیے۔”

ٹی ایم سی نے بنگال کو جرائم، بم دھماکوں اور ظلم کی سرزمین بنا دیا

انہوں نے دراندازی، بدعنوانی اور ہندوؤں کی نقل مکانی کو روکنے کی بات بھی کہی۔ شاہ نے ممتا بنرجی پر الزام لگایا کہ انہوں نے بنگال کو جرائم، بم دھماکوں اور ظلم کی سرزمین میں بدل دیا ہے۔ انہوں نے کہا: “ممتا ’ماں، ماٹی، مانوش‘ (ماں، مٹی، انسان) کا نعرہ لے کر آئیں، لیکن بنگال کو دراندازی اور ہندوؤں کے ساتھ ناانصافی کی جگہ بنا دیا۔”

شاہ نے یہ بھی دعویٰ کیا کہ ممتا کے دور حکومت میں سینکڑوں بی جے پی کارکنان کا قتل ہوا ہے۔ انہوں نے کارکنان کو یقین دلایا کہ اقتدار میں آنے کے بعد قاتلوں کو سزا دی جائے گی، چاہے وہ زمین کے نیچے ہی کیوں نہ چھپے ہوں۔

2026 کے اسمبلی انتخابات کے لیے بی جے پی کا روڈ میپ تیار کیا جا رہا ہے

بی جے پی کارکنان کی خصوصی تنظیمی میٹنگ میں شاہ نے 2026 کے انتخابات کے لیے بی جے پی کا روڈ میپ بھی تیار کیا اور کارکنوں سے متحد ہو کر کام کرنے کی اپیل کی۔ ان کے اس بیان سے مغربی بنگال کی سیاست میں ہلچل مچ گئی ہے اور آئندہ دنوں میں سیاسی ماحول مزید گرم ہونے کا امکان ہے۔

بھارت ایکسپریس اردو۔