Heavy Rains Delhi-NCR: دہلی، نوئیڈا سمیت پورے این سی آر میں موسلادھار بارش، رات تک تیز بارش اور آسمانی بجلی گرنے کا امکان، یلو الرٹ جاری

نئی دہلی: جنم اشٹمی کے موقع پر قومی راجدھانی دہلی سمیت پورے این سی آر میں موسم کا مزاج اچانک بدل گیا ہے۔ جمعہ کی سہ پہر تقریباً 3 بجے کے بعد دہلی، نوئیڈا اور این سی آر کے کئی علاقوں میں گرج چمک کے ساتھ موسلادھار بارش شروع ہوگئی۔ محکمہ موسمیات نے آج رات تک بارش کا سلسلہ جاری رہنے کی پیش گوئی کی ہے۔ دہلی کے لیے یلو الرٹ بھی جاری کیا گیا ہے، جبکہ جمعہ اور ہفتہ کو راجدھانی میں ہلکی سے درمیانی بارش کا امکان ظاہر کیا گیا ہے۔ محکمہ موسمیات کے مطابق دہلی میں بیشتر مقامات پر ہلکی سے درمیانی بارش ہوسکتی ہے، جبکہ کچھ علاقوں میں تیز بارش بھی ہونے کا امکان ہے۔ خاص طور پر دوپہر کے بعد سے رات کے درمیان گرج چمک کے ساتھ آندھی اور آسمانی بجلی گرنے کا امکان ہے۔ شام سے رات تک تقریباً 20 کلومیٹر فی گھنٹہ کی رفتار سے ہوائیں بھی چل سکتی ہیں۔ دہلی میں کم سے کم درجہ حرارت تقریباً 24 ڈگری سیلسیس اور زیادہ سے زیادہ درجہ حرارت 31 ڈگری سیلسیس کے آس پاس رہنے کی توقع ہے۔ بیشتر وقت آسمان پر بادل چھائے رہیں گے اور وقفے وقفے سے بارش ہوتی رہے گی۔ نوئیڈا میں بھی مطلع ابر آلود رہنے کے ساتھ بارش کا امکان ہے۔

#WATCH | Delhi: Rain lashes parts of the National Capital; visuals from Lajpat Nagar Area pic.twitter.com/s5sBUXylTI

— ANI (@ANI) September 4, 2026

ہفتہ کو بھی بارش کا سلسلہ جاری رہنے کی توقع

محکمہ موسمیات کے مطابق ہفتہ کو دہلی میں آسمان ابر آلود رہے گا۔ صبح سے دوپہر تک گرج چمک کے ساتھ ہلکی سے درمیانی بارش ہوسکتی ہے۔ دوپہر سے شام کے درمیان کچھ علاقوں میں دوبارہ درمیانی بارش کا دور شروع ہونے کا امکان ہے۔ اس دوران آندھی، گرج چمک اور آسمانی بجلی کا بھی امکان رہے گا۔ ہفتہ کو دہلی میں زیادہ سے زیادہ درجہ حرارت 29 سے 31 ڈگری سیلسیس اور کم سے کم درجہ حرارت 24 سے 26 ڈگری سیلسیس کے درمیان رہ سکتا ہے۔ اتوار کو دہلی میں آسمان جزوی طور پر ابر آلود رہنے کی توقع ہے۔ اس دوران بہت ہلکی بارش ہوسکتی ہے۔ زیادہ سے زیادہ درجہ حرارت 31 سے 33 ڈگری سیلسیس اور کم سے کم درجہ حرارت 22 سے 24 ڈگری سیلسیس کے درمیان رہنے کا امکان ہے۔

بھارت ایکسپریس اردو۔