Umesh Pal Murder Case: مافیا عتیق کے بھائی اشرف کا ساتھ دینا پڑا مہنگا، جیلر سمیت 6 اہلکار معطل، ہو سکتی ہے گرفتاری

Umesh Pal Murder Case: بریلی جیل میں بند عتیق احمد کے بھائی خالد عظیم عرف اشرف اور اس کے ساتھی اور سالےسے غیر قانونی ملاقات کرانے پر جیلر سمیت بریلی جیل کے چھ اہلکاروں کو معطل کر دیا گیا ہے۔ معطل ہونے والوں میں جیلر راجیو کمار مشرا، ڈپٹی جیلر درگیش پرتاپ سنگھ، ہیڈ وارڈن برج ویر سنگھ اور وارڈن منوج گوڑ، دانش مہندی اور دلپت سنگھ شامل ہیں۔ ذرائع کا کہنا ہے کہ جلد تمام گرفتاریاں بھی ہوسکتی ہیں۔

واضح رہے کہ سابق ایم ایل اے اشرف مافیا عتیق احمد کے چھوٹے بھائی ہیں، جو اس وقت گجرات کی سابرمتی جیل میں بند ہیں۔ 25 جنوری 2005 کو پریاگ راج میں بی ایس پی ایم ایل اے راجو پال کے قتل کے سلسلے میں اشرف بریلی کی جیل میں ہے۔ ریاستی حکومت نے قبل ازیں اشرف کی غیر قانونی ملاقاتوں کی تحقیقات کا حکم دیا تھا۔ حکومت کو پیش کی گئی اپنی رپورٹ میں ڈی آئی جی جیل آر این پانڈے نے افسران کے نام لیے ہیں۔

کینٹین فراہم کرنے والے دیا رام اور جیل گارڈ شیو ہری اوستھی کو اس سے قبل پولیس نے جیل کے اندر خفیہ ملاقاتیں کرنے میں اشرف کی مدد کرنے پر گرفتار کیا تھا۔ اس پر جیل کے باہر سے اشرف کو کھانا اور سامان سپلائی کرنے کا بھی الزام ہے۔

یہ بھی پڑھیں- Umesh Pal Murder Case: امیش پال قتل سانحہ میں شائستہ پروین پر انعام کا اعلان، گرفتاری کے لئے پولیس کر رہی ہے چھاپہ ماری

 

ڈی آئی جی جیل آر این پانڈے کی پیش کردہ رپورٹ کے مطابق، اشرف کے سالے صدام نے جیلر، ڈپٹی جیلر اور دیگر اہلکاروں کی مدد سے جیل میں ان سے ملاقات کی۔ جیل کے سرکاری ریکارڈ میں ملاقاتوں کا کوئی ذکر نہیں ہے۔ دیا رام نے پیسے دیے اور جیل کے باہر سے اشرف کے لیے کھانے اور دیگر چیزوں کا بندوبست کیا۔

بریلی جیل انتظامیہ نے پہلے ہی اشرف، صدام، ان کے مقامی ساتھی للا گدی، شیو ہری اوستھی اور دیا رام کے خلاف ایف آئی آر درج کر رکھی ہے۔

اس سے پہلے 12 فروری کو جیل کے احاطے سے جیل میں بند ایم ایل اے عباس انصاری کی بیوی نکہت بانو اور ان کے ڈرائیور نیاز انصاری کی گرفتاری کے بعد چترکوٹ جیل انتظامیہ، کینٹین سپلائر اور مجرموں کے درمیان اسی طرح کا گٹھ جوڑ بے نقاب ہوا تھا۔

-بھارت ایکسپریس