GRAP Stage 4 In Delhi-NCR: دہلی میں سرکاری دفاتر کے اوقات میں تبدیلی کا حکم جاری، 28 فروری تک رہے گا نافذ

GRAP Stage 4 In Delhi-NCR: آلودگی کی بڑھتی ہوئی سطح کو دیکھتے ہوئے، دہلی میں لاگو GRAP قوانین کے تحت، دہلی حکومت نے سرکاری دفاتر کے کام کے لیے مختلف اوقات کا اعلان کیا۔ دہلی حکومت کے جنرل ایڈمنسٹریشن ڈیپارٹمنٹ نے یہ حکم جاری کیا۔ اس حکم کے مطابق ایم سی ڈی کے دفاتر صبح 8:30 بجے سے شام 5 بجے تک اور دہلی حکومت کے دفاتر صبح 10 بجے سے شام 6:30 بجے تک کام کریں گے۔ یہ حکم 28 فروری 2025 تک نافذ العمل رہے گا۔

ایل این جے پی میں خصوصی ٹاسک فورس بنانے کی ہدایات

اس دوران دہلی کے وزیر ماحولیات گوپال رائے نے مرکزی حکومت پر سخت نکتہ چینی کی۔ انہوں نے کہا کہ دہلی حکومت نے محکمہ صحت کو آلودگی سے متعلق طبی ایمرجنسی کی صورتحال سے نمٹنے کے لیے لوک نائک جے پرکاش (ایل این جے پی) اسپتال میں ایک خصوصی ٹاسک فورس بنانے کی ہدایت کی۔

اوڈ-ایون اسکیم کے نفاذ سے متعلق ایک سوال کے جواب میں، انہوں نے کہا کہ حکومت دہلی میں آلودگی کی سطح کو کنٹرول کرنے کے لیے تمام ضروری اقدامات کرے گی۔ گوپال رائے نے کہا، ’’میں نے محکمہ صحت کو ہدایت دی ہے کہ وہ ایل این جے پی اسپتال میں طبی ہنگامی صورتحال سے نمٹنے کے لیے ایک خصوصی ٹاسک فورس بنائے۔‘‘

مرکزی حکومت سو رہی ہے: گوپال رائے

بی جے پی کو نشانہ بناتے ہوئے انہوں نے کہا کہ پورے شمالی ہندوستان کو فضائی آلودگی کی سنگین سطح کا سامنا ہے، لیکن مرکزی حکومت سو رہی ہے۔ عام آدمی پارٹی کے سینئر لیڈر نے کہا کہ مرکزی حکومت کو شمالی ہندوستان میں فضائی آلودگی کی بڑھتی ہوئی سطح سے نمٹنے کے لئے فوری اقدامات کرنے چاہئے تھے۔ انہوں نے کہا کہ اس نازک وقت میں فوری کارروائی کی ضرورت کے باوجود بی جے پی خاموش ہے اور مرکزی حکومت گہری نیند سو رہی ہے۔

یہ بھی پڑھیں- Air Pollution: بی جے پی نے آلودگی پر خاموشی اختیار کی، مرکزی حکومت سو رہی ہے، گوپال رائے نے کیا سخت حملہ

دہلی کے وزیر نے دعویٰ کیا کہ اگر مرکزی حکومت تعاون کرتی اور بروقت کارروائی کرتی تو دہلی کے لوگوں کو ان خطرناک حالات کا سامنا نہ کرنا پڑتا۔ انہوں نے مرکزی حکومت سے ہنگامی اقدامات کرنے کی درخواست کی۔ ایئر کوالٹی انڈیکس (AQI) کے 450 سے تجاوز کرنے کے بعد، دہلی حکومت نے قومی دارالحکومت میں GRAP کے چوتھے مرحلے کے تحت کئی اقدامات کیے ہیں۔

-بھارت ایکسپریس