Gautam Adani Urges Staff To Drive Growth: سیبی کی کلین چٹ کے بعد گوتم اڈانی کا پیغام: ’’وہ بادل چھٹ گیا جو دو سال سے منڈلا رہا تھا‘‘

ہنڈن برگ رپورٹ کے الزامات پر ڈھائی سال تک جاری تنازعے کے بعد اڈانی گروپ کو بڑی راحت ملی ہے۔ بازار کے نگراں ادارے سیبی نے اپنی تحقیقات مکمل کرتے ہوئے تمام الزامات کو خارج کر دیا۔ اس کے بعد گروپ کے چیئرمین گوتم اڈانی نے ملازمین کو جذباتی پیغام بھیجا اور کہا کہ اب کمپنی پوری قوت کے ساتھ نوآوری، شفافیت اور طویل مدتی ترقی پر توجہ دے گی۔

ہنڈن برگ رپورٹ کا پس منظر

جنوری 2023 میں امریکی شارٹ سیلر ہنڈن برگ ریسرچ نے اڈانی گروپ پر اکاؤنٹنگ بے ضابطگیوں، حصص کی قیمتوں میں ہیرا پھیری اور آف شور کمپنیوں کے ذریعے سرمایہ کاری جیسے الزامات لگائے تھے۔ اس کے نتیجے میں اڈانی گروپ کے حصص میں بھاری گراوٹ آئی اور مارکیٹ کیپ ایک وقت میں 150 ارب ڈالر سے زائد کم ہو گیا۔ ابتدا ہی سے اڈانی گروپ نے ان الزامات کو بے بنیاد قرار دیا تھا۔ اب سیبی نے واضح کر دیا کہ ہنڈن برگ کے اعتراضات میں شامل لین دین، متعلقہ فریقین کے زمرے میں آتے ہی نہیں۔

ملازمین کے لیے جذباتی پیغام

گوتم اڈانی نے اس تنازعے کو ’’ہدف بنا کر کیا گیا کثیر الجہتی حملہ‘‘ قرار دیا اور کہا کہ اس دوران ملازمین نے جس استقامت کے ساتھ کمپنی چلائی، وہی اصل پہچان ہے۔ انہوں نے کہا: ’’دنیا بحث کرتی رہی، لیکن ہمارے بندرگاہ پھیلتے رہے، ٹرانسمیشن لائنیں آگے بڑھتی رہیں، پاور پلانٹس چلتے رہے، قابل تجدید توانائی کے منصوبے ہرے بھرے ہوئے، ہوائی اڈے ترقی کرتے رہے، سیمنٹ بھٹیاں جلتی رہیں اور لاجسٹک ٹیم وقت پر ڈیلیوری کرتی رہی۔ یہی حقیقی اڈانی کردار ہے۔‘‘

مستقبل کا وژن اور ترجیحات

اڈانی نے واضح کیا کہ گروپ کا مستقبل چار ستونوں پر قائم ہوگا: شفافیت اور ایمانداری، نوآوری اور نئی ٹیکنالوجی، طویل المدتی سوچ اور پائیدار ترقی، تبدیلی اور خوابوں کی تعبیر۔ انہوں نے کہا کہ ہم آج کی تالیاں حاصل کرنے کے بجائے ایسی میراث بنائیں گے جو دہائیوں تک باقی رہے۔

بحران سے مضبوطی تک

گوتم اڈانی نے اس دور کو ’’اگنی پریکشا‘‘ کہا اور ملازمین و ان کے خاندانوں کا شکریہ ادا کیا۔ ان کا کہنا تھا کہ ہر بحران بنیاد کو مزید مضبوط کرتا ہے اور آنے والے وقت میں بھی یہی طاقت گروپ کو آگے بڑھائے گی۔

ہنڈن برگ کے بعد کی صورت حال

اڈانی گروپ نے پچھلی دہائی میں بندرگاہوں اور توانائی سے آگے بڑھ کر ہوائی اڈے، سیمنٹ، ڈیٹا سینٹرز اور گرین ہائیڈروجن جیسے نئے شعبوں میں تیز رفتار توسیع کی۔ اگرچہ ہنڈن برگ رپورٹ کے بعد سرمایہ کاروں کا اعتماد متزلزل ہوا، لیکن گروپ نے قرض کم کیا، عالمی سرمایہ کاروں سے سرمایہ حاصل کیا اور ترقیاتی منصوبے جاری رکھے۔ ماہرین کا کہنا ہے کہ سیبی کے فیصلے سے سرمایہ کاروں کا اعتماد بحال ہوگا اور گروپ کو سستی عالمی فنڈنگ دستیاب ہو سکے گی۔ گوتم اڈانی نے اپنے پیغام کے آخر میں کہا: ’’آنے والے سال تاریخ اس طرح یاد رکھے کہ ان تین برسوں کی آگ نے ایک اور مضبوط اڈانی کی بنیاد رکھی۔ ہماری کہانی حوصلے، یقین اور اس وعدے کی گواہ بنے جو ہم نے اپنی مادر وطن بھارت سے کیا تھا۔ ستیہ میو جیتے، جے ہند۔‘‘

بھارت ایکسپریس اردو۔