Arvind Kejriwal Arrested: کیجریوال کی گرفتاری پر اکھلیش یادو کا ردعمل، کہا- انتخابی بانڈ کے انکشافات سے خوفزدہ بی جے پی کر رہی ہے دھیان بھٹکانے کی کوشش

سیتاپور: سماج وادی پارٹی (SP) کے صدر اکھلیش یادو نے بدعنوانی کے معاملے میں دہلی کے وزیر اعلی اروند کیجریوال کی گرفتاری کو انتخابی بانڈز سے متعلق انکشافات سے گھبرائی بھارتیہ جنتا پارٹی (BJP) کی مدعوں سے دھیان بھٹکانے کی کوشش قرار دیتے ہوئے جمعہ کے روز کہا کہ بی جے پی چاہے جتنے لیڈروں کو جیل بھیج دے، لیکن وہ عوام کو جیل نہیں بھیج سکتی، جو اسے آئندہ لوک سبھا انتخابات میں سبق سکھائے گی۔ یادو یہاں مختلف مجرمانہ مقدمات میں سزا کے تحت سیتا پور جیل میں بند ایس پی کے سینئر لیڈر اور سابق وزیر اعظم خان سے ملنے آئے تھے۔

نامہ نگاروں سے بات کرتے ہوئے ایک سوال پر انہوں نے کیجریوال کی گرفتاری کی طرف اشارہ کرتے ہوئے کہا، “انتخابی بانڈز کے انکشافات نے بی جے پی کا  بینڈ بجا دیا ہے۔” کیا بی جے پی والوں کو الیکٹورل بانڈز کا فائدہ نہیں ملا؟ گھبراہٹ میں مدعا بدلنے کا یہ جو طریقہ ہے اس میں بی جے پی کامیاب نہیں ہوگی۔ یہ چاہے کتنے ہی لیڈروں کو جیل بھیج دے، عوام کو جیل نہیں بھیج سکتے۔ عوام انہیں سبق سکھائے گی۔

یادو نے کہا، کیا ملک قبول کرے گا کہ جھوٹے مقدمات درج کرکے لوگوں کو جیل بھیجا جائے؟ ظالم کتنا ہی ظلم کیوں نہ کرے آخر کار حق کی ہی جیت ہوتی ہے۔ انہوں نے کہا، ’’صرف وزیر اعلیٰ کو جیل بھیجنے اور خبروں کو کنٹرول کرنے سے وہ (بی جے پی) جمہوریت میں جیت نہیں پائے گی۔ یہ لوگ جمہوریت کو کمزور کر رہے ہیں۔ حکومت جمہوریت میں آواز اٹھانے والوں کی آواز کو دبانا چاہتی ہے۔

یادو نے کہا، ”صرف پی ڈی اے (پسماندہ، دلت اور اقلیت) ہی این ڈی اے (بی جے پی زیرقیادت قومی جمہوری اتحاد) کو شکست دے گی اور حکومت پی ڈی اے سے خوفزدہ ہے۔ وقت سے زیادہ طاقتور کوئی نہیں ہے اور وقت آنے پر عوام بی جے پی کو بھی سبق سکھائے گی۔

لوک سبھا انتخابات میں ‘انڈین نیشنل ڈیولپمنٹ انکلوسیو الائنس’ (انڈیا) کے تحت اتر پردیش میں ایک بھی سیٹ نہ ملنے پر ناراض اپنا دل (کمیراوادی) لیڈر پلوی پٹیل کے بیان کے بارے میں پوچھے گئے ایک سوال پر ایس پی صدر نے کہا، ‘ساتھ چھوڑنے والوں کی کہانی بہت لمبی ہے اور آپ سے بہتر کوئی نہیں جانتا کہ کوئی کیوں ساتھ چھوڑ رہا ہے۔’

بھارت ایکسپریس۔