Delhi High Court Decision on Foreign Citizens: ہندوستان میں رہنے اور بسنے کا دعویٰ نہیں کرسکتے غیرملکی شہری: دہلی ہائی کورٹ

 دہلی ہائی کورٹ نے ایک اہم فیصلے میں کہا ہے کہ کوئی بھی غیر ملکی شہری آئین کے آرٹیکل 19 (1) (ای) کے تحت ہندوستان میں رہنے یا بسنے کے حق کا دعویٰ نہیں کرسکتا۔ جسٹس سریش کمارکیت اورجسٹس منوج جین کی ڈویژن بنچ نے کہا کہ غیرملکیوں یا مشتبہ غیرملکیوں کے بنیادی حقوق صرف آئین ہند کے آرٹیکل 21 کے تحت اعلان کردہ زندگی اورآزادی کے حق تک محدود ہیں۔ بنچ نے کہا کہ ہم یہ بھی نوٹ کرسکتے ہیں کہ غیرملکی شہری یہ دعویٰ نہیں کرسکتے کہ انہیں آئین ہند کے آرٹیکل 19 (1) (ای) کے مطابق ہندوستان میں رہنے اورآباد ہونے کا حق حاصل ہے۔

دہلی ہائی کورٹ نے سپریم کورٹ کے فیصلے کا دیا حوالہ

بنچ نے نورین برگ بنام پریسیڈنسی جیل، کولکاتا کے ہنس مولرکے معاملے میں سپریم کورٹ کے 1955 کے فیصلے کا بھی حوالہ دیا، جس میں سپریم کورٹ نے کہا تھا کہ غیرملکیوں کو ملک بدرکرنے کے لئے حکومت ہند کا اختیارمطلق اورلامحدود ہے اوراس میں کوئی گنجائش نہیں ہے۔ آئین میں ایسی صوابدید کو محدود کرنے کی شق موجود ہے۔ عدالت نے ازل چکما نام کے ایک مشتبہ بنگلہ دیشی شہری کے اہل خانہ کی جانب سے دائرکی گئی ہیبیس کارپس کی درخواست کو مسترد کردیا ہے۔ اس بنگلہ دیشی خاندان کوگزشتہ سال اکتوبرمیں دہلی کے اندرا گاندھی انٹرنیشنل ایئرپورٹ پر پکڑا گیا تھا۔

ملزم کو بھیجا جائے گا بنگلہ دیش
اس پرالزام تھا کہ اس نے پہلے بنگلہ دیشی پاسپورٹ پرہندوستان کا سفرکیا تھا، لیکن بعد میں دھوکہ دہی سے ہندوستانی دستاویزات (بشمول پاسپورٹ) حاصل کیں۔ بعد ازاں ہندوستانی حکام نے پاسپورٹ منسوخ کردیا۔عدالت کو بتایا گیا کہ چکما کی سرگرمیاں فارنرزایکٹ 1946 کے سیکشن 3 (2) (ای) کے تحت قابل سزا ہیں، جو فارنرزآرڈر1948 کے سیکشن 11(2) کے ساتھ پڑھے گئے ہیں۔ بنچ کو بتایا گیا کہ بنگلہ دیش کے ہائی کمیشن نے چکما کی وطن واپسی کے لئے سفری اجازت نامے کے دستاویزات پہلے ہی جاری کر دیئے ہیں اورجیسے ہی حکام کوبنگلہ دیش کے سفارت خانہ سے اس کے لئے تصدیق شدہ ہوائی ٹکٹ مل جائے گا، اسے ملک بدر کردیا جائے گا۔
قابل ذکرہے کہ آئین کے آرٹیکل 19 (1) (ای) کے مطابق ہندوستان کے ہرشہری کوہندوستان کے کسی بھی حصے میں رہنے اورآباد ہونے کا حق حاصل ہے۔ اس شق کا مقصد ملک کے اندر یا کسی خاص حصے میں اندرونی رکاوٹوں کو دورکرنا ہے۔ یہ حق آرٹیکل 19 کی شق (5) میں مذکورمعقول پابندیوں کے ساتھ بھی مشروط ہے۔