Greater Noida fire: گریٹر نوئیڈامیں الیکٹرانک چِپ کمپنی میں درد ناک حادثہ، لوہے کی بیم گرنے سے 2 فائر اہلکار جاں بحق، 3 زخمی

نئی دہلی :گریٹر نوئیڈا کے ایکوٹیک-3 تھانہ علاقے میں واقع الیکٹرانک چِپ تیار کرنے والی آئی ایل جی آئی ایم (ILGIM) کمپنی میں پیر اور منگل کی درمیانی شب خوفناک آگ لگنے سے علاقے میں افرا تفری مچ گئی۔ آگ پر قابو پانے کی کارروائی کے دوران کمپنی کی ایک دیوار اور لوہے کا بھاری بیم اچانک گر گیا، جس کے نتیجے میں پانچ فائر اہلکار ملبے تلے دب گئے۔ اس افسوسناک حادثے میں دو فائر اہلکار جان کی بازی ہار گئے، جبکہ تین دیگر زخمیوں کا اسپتال میں علاج جاری ہے۔ پولیس کے مطابق زخمی اہلکاروں کی حالت اب خطرے سے باہر بتائی جا رہی ہے۔پولیس کے مطابق پیر کی دیر رات آئی ایل جی آئی ایم کمپنی میں آگ لگنے کی اطلاع ملتے ہی ایکوٹیک-3 پولیس اور فائر سروس کی متعدد ٹیمیں کئی فائر بریگیڈ گاڑیوں کے ساتھ جائے وقوع پر پہنچ گئیں۔ کمپنی میں الیکٹرانک چِپس کی تیاری کا کام ہوتا ہے، جہاں آتش گیر مواد کی موجودگی کے باعث آگ تیزی سے پھیل گئی۔ فائر اہلکاروں نے فوری طور پر آگ بجھانے اور اسے مزید پھیلنے سے روکنے کی کارروائی شروع کی۔

اسی دوران جب فائر اہلکار آگ پر قابو پانے کی کوشش کر رہے تھے تو کمپنی کی سائیڈ میں واقع ایک دیوار اور اس سے منسلک لوہے کا بڑا بیم اچانک بھر بھر ا کر گر پڑا۔ ملبے کی زد میں آکر فائر سروس کے ہیڈ کانسٹیبل ڈرائیور راج پال سنگھ، ہیڈ کانسٹیبل ڈرائیور تیرتھ پال سنگھ، فائر مین منیش کمار، فائر مین امت کمار اور فائر مین روہت یادو شدید زخمی ہو گئے۔حادثے کے فوراً بعد پولیس، فائر سروس اور دیگر امدادی ٹیموں نے مشترکہ طور پر ریسکیو آپریشن شروع کیا۔ تمام زخمی اہلکاروں کو ملبے سے نکال کر ایمبولینس کے ذریعے قریبی اسپتال منتقل کیا گیا، جہاں ڈاکٹروں نے فائر مین روہت یادو اور ہیڈ کانسٹیبل ڈرائیور تیرتھ پال سنگھ کو مردہ قرار دے دیا۔ باقی تین زخمی اہلکاروں، راج پال سنگھ، منیش کمار اور امت کمار کا علاج جاری ہے اور ڈاکٹروں کے مطابق ان کی حالت مستحکم ہے۔

واقعے کی اطلاع ملتے ہی پولیس کے اعلیٰ افسران بھی موقع پر پہنچ گئے۔ ملبے میں کسی اور شخص کے دبے ہونے کے خدشے کے پیش نظر اسٹیٹ ڈیزاسٹر ریسپانس فورس (SDRF) کی ٹیم کو بھی طلب کیا گیا، جس نے علاقے کا مکمل معائنہ کیا۔ کئی گھنٹوں کی مسلسل کوششوں کے بعد آگ پر مکمل طور پر قابو پا لیا گیا۔ پولیس نے جاں بحق فائر اہلکاروں کی لاشیں قبضے میں لے کر پوسٹ مارٹم کے لیے بھیج دی ہیں، جبکہ آگ لگنے کی اصل وجہ جاننے کے لیے تفصیلی تحقیقات شروع کر دی گئی ہیں۔ اس المناک حادثے نے فائر سروس کے اہلکاروں کی بہادری اور فرض شناسی کو ایک بار پھر اجاگر کر دیا ہے، جنہوں نے دوسروں کی جان و مال بچاتے ہوئے اپنی جانوں کا نذرانہ پیش کیا۔

بھارت ایکسپریس اردو