Human Trafficking case: نابالغ لڑکیوں کو بیچنے والے گروہ کی خاتون رکن گرفتار، ریلوے سٹیشن سے ایک بچی برآمد

جمشید پور: جھارکھنڈ کے سب سے قدیم صنعتی شہر جمشید پور کی ریلوے پولیس نے اتوار کے روز ریاست کی نابالغ لڑکیوں کو بڑے شہروں میں بیچنے والے ریکیٹ میں ملوث ایک خاتون کو گرفتار کیا ہے۔ پولیس نے ایک نابالغ لڑکی کو بھی برآمد کیا ہے جسے بیچنے کے لیے دہلی لے جایا جا رہا تھا۔ یہ لڑکی جمشید پور کی پرسوڈیہ لوکو کالونی کی رہنے والی بتائی جا رہی ہے۔

لڑکی کو بیچنے کے الزام میں جس خاتون کو گرفتار کیا گیا ہے اس کا نام نیشو تِیو ہے۔ وہ مشرقی سنگھ بھوم کے ڈومریہ کی رہنے والی ہے۔ اس نے ابتدائی پوچھ گچھ کے دوران اعتراف کیا ہے کہ وہ لڑکیوں کی بیچنے ولاے ریکیٹ میں ملوث ہے۔ اس نے بتایا ہے کہ رانچی کی رہنے والی انجلی کچپ نے اسے اس کام میں لگایا تھا۔ انجلی کچپ نے لڑکیوں کو رانچی لے جانے کا کرایہ بھی ادا کیا۔

اس نے بتایا کہ پہلے وہ دہلی میں کام کرتی تھی۔ اس دوران اس کی ملاقات انجلی کچپ سے ہوئی اور اس نے اسے نیٹ ورک سے جوڑ دیا۔ اسے ہر لڑکی کے لیے 10-15 ہزار روپے دیے گئے۔ اب تک بیچے جانے ہونے والی زیادہ تر لڑکیاں قبائلی برادری سے تعلق رکھتی ہیں۔

جمشید پور کے پرسوڈیہ پولیس اسٹیشن میں نیشو تیو سے پوچھ گچھ کے بعد پولیس نے اسے عدالتی حراست میں بھیج دیا ہے۔ اس کے بیان کی بنیاد پر یہ مانا جاتا ہے کہ انجلی کچپ اس ریکیٹ کی سرغنہ ہے۔

پولیس کے مطابق نشو تیو کی دی گئی اطلاع پر ٹرین سے برآمد ہونے والی لڑکی کو انجلی کچپ خود دہلی لے جا رہی تھی۔ پولیس کے پہنچتے ہی وہ چکمہ دے کر بھاگ گئی۔ اس کی گرفتاری کے لیے ممکنہ ٹھکانوں پر چھاپے مارے جا رہے ہیں۔

بازیاب ہونے والی لڑکی کو پیر کے روز عدالت میں پیش کیا جائے گا۔ اس سے پہلے بھی جھارکھنڈ میں لڑکیوں کو بیچنے والے کئی گروہوں کا پردہ فاش ہو چکا ہے۔ ان کا ہدف غریب اور ان پڑھ قبائلی لڑکیاں ہیں، جنہیں وہ بہتر ملازمتوں اور کیریئر کے بہانے بڑے شہروں میں لے جاتے ہیں اور پھر انہیں وہاں کے خریداروں کو بھاری رقم کے عوض بیچ دیتے ہیں۔

بھارت ایکسپریس۔