ED Summons CM Hemant Soren’s Media Advisor: ہیمنت سورین کے پریس سکریٹری ابھیشیک پرساد کو ای ڈی نے بھیجا سمن، صاحب گنج ڈی سی کو بھی پوچھ گچھ کے لئے بلایا

غیر قانونی کانکنی کے تخمینہ 1250 کروڑ روپئے کے مبینہ زمین گھوٹالہ معاملے کی انفورسمنٹ ڈائریکٹوریٹ (ای ڈی) تحقیقات کر رہی ہے۔ اسی ضمن میں اب ای ڈی نے  جھارکھنڈ کے وزیراعلیٰ ہیمنت سورین کے قریبی لوگوں کو سمن بھیجنا شروع کر دیا ہے۔ سمن جاری کرتے ہوئے ای ڈی نے وزیراعلیٰ سورین کے پریس ایڈوائزر ابھیشیک پرساد عرف پنٹو کو16 جنوری کو بلایا ہے۔ میڈیا کے مطابق، ان کی گرفتاری بھی ہوسکتی ہے۔ اس کے علاوہ صاحب گنج کے ڈی سی رام نواس یادوکو 11 جنوری کواوربلڈر ونود سنگھ کو 15 جنوری کو ای ڈی کے دفترمیں پوچھ گچھ کے لئے حاضر ہونے کو کہا ہے۔

 3 جنوری کو ای ڈی نے کی تھی چھاپہ ماری

صاحب گنج میں 1250 کروڑ کے مبینہ غیرقانونی کانکنی اورای ڈی کے گواہ وجے ہانسدا کو متاثرکرنے سے متعلق معاملے میں ای ڈی نے گزشتہ تین جنوری کو بڑی کارروائی کی تھی۔ ای ڈی نے ایک ساتھ وزیراعلیٰ ہیمنت سورین کے پریس ایڈوائزر(میڈیا مشیر) ابھیشیک پرساد عرف پنٹو، صاحب گنج کے ڈی سی رام نواس یادو، ڈی ایس پی راجیندردوبے، صاحب گنج کے کانکنی تاجر کھدانیا برادران، وزیراعلیٰ کے دوست ونود کمارسنگھ، روشن سنگھ، کولکاتا کے تاجرابھے سراؤگی، سابق رکن اسمبلی پپو یادو، رانچی کے برسا منڈا جیل کے جماداراودھیش کمار کے ٹھکانوں پر چھاپہ ماری کی تھی۔ چھاپہ ماری کے دوران شیل کمپنیوں کے ذریعہ سرمایہ کاری، مشتبہ فائنانشیل ٹرانجکشن کے ثبوت ایجنسی کو ملے ہیں۔ برآمدگی کی بنیاد پر ہی ای ڈی اب آگے کی کارروائی کر رہی ہے۔