ای ڈی کا دعویٰ، دہلی شراب گھوٹالہ معاملے میں دی گئی 100 کروڑ روپے کی رشوت

نئی دہلی، 11 نومبر (بھارت ایکسپریس): انفورسمنٹ ڈائریکٹوریٹ (ای ڈی) نے جمعرات کو دعویٰ کیا کہ دہلی میں شراب کی فروخت کی نئی پالیسی سے متعلق ایک معاملے میں 100 کروڑ روپے کی رشوت دی گئی تھی، جس میں نائب وزیر اعلیٰ منیش سسودیا ملزم ہیں۔  ایجنسی نے دعویٰ کیا کہ سسوڈیا سمیت تین درجن سے زیادہ VIPs نے مبینہ طور پر 140 موبائل فون کا تبادلہ کیا تاکہ ڈیجیٹل ثبوت کو ختم کیا جا سکے۔  سسودیا کو ایجنسی اور سی بی آئی کے ذریعہ اس معاملے میں متعدد چھاپوں کا نشانہ بنایا گیا تھا۔ حالانکہ انہوں نے کسی بھی غلط کام سے انکار کیا  تھا اور کہا کہ یہ الزامات سیاسی طور پر محرک کیے گئے ہیں۔  ان کا کہنا ہے کہ چھاپوں میں ان کے خلاف کچھ نہیں ملا۔

دوسری طرف دہلی کے وزیر اعلی اروند کیجریوال نے سسودیا کی حمایت کرتے ہوئے کہا ہے کہ مرکز میں بی جے پی کی قیادت والی حکومت اگلے ماہ گجرات میں ہونے والے انتخابات سے قبل عام آدمی پارٹی (اے اے پی) کے رہنماؤں کو نشانہ بنا رہی ہے۔  تحقیقاتی اداروں کا غلط استعمال ہو رہا ہے۔  انفورسمنٹ ڈائریکٹوریٹ نے شراب کی فروخت کی پالیسی سے متعلق ایک معاملے میں جمعرات کو دو نجی کمپنیوں کے دو اہلکاروں کو گرفتار کرنے کے بعد یہ دعویٰ کیا ہے۔

 گرفتار کیے گئے دو افراد میں شراب کمپنی پرنوڈ ریکارڈ کے جنرل منیجر بنوئے بابو اور اربندو فارما کے کل وقتی ڈائریکٹر اور پروموٹر پی شرت چندر ریڈی شامل ہیں۔  انہیں آدھی رات کے فوراً بعد حراست میں لے لیا گیا۔ حکام نے بتایا کہ، ایجنسی نے بعد میں انہیں دہلی کی ایک خصوصی عدالت میں پیش کیا اور انہیں سات دن کے لیے انفورسمنٹ ڈائریکٹوریٹ کی تحویل میں بھیج دیا۔ اربندو فارما لمیٹڈ نے شیئر بازار کو لکھے ایک نوٹ میں کہا کہ ریڈی کسی بھی طرح سے کمپنی یا اس کے ماتحت اداروں کے کاموں سے منسلک نہیں ہے۔ ان دونوں کے علاوہ انفورسمنٹ ڈائریکٹوریٹ نے ستمبر میں شراب بنانے والی کمپنی انڈو اسپرٹ کے منیجنگ ڈائریکٹر ثمیر مہندرو کو گرفتار کیا تھا۔

ایجنسی نے عدالت کو بتایا کہ ریڈی نے تقریباً 100 کروڑ روپے رشوت کے لیے جمع کیے جو سیاسی رہنماؤں اور عہدیداروں کو دیے گئے تھے۔  حکام نے الزام لگایا کہ دونوں گرفتار افسران تفتیش کے دوران ٹال مٹول کر  رہے تھے۔  ایجنسی نے یہ بھی دعویٰ کیا کہ اس نے یہ بھی پایا کہ خوردہ شراب کے کاروبار میں ایک ادارے کے ذریعہ  200 کروڑ روپے کی سرمایہ کاری پالیسی کی ہدایات کی خلاف ورزی کرتے ہوئے کی گئی تھی۔

 انفورسمنٹ ڈائریکٹوریٹ کا منی لانڈرنگ کیس سی بی آئی کی ایف آئی آر سے نکلا ہے، جس میں منیش سسودیا اور دیگر کو ملزم بنایا گیا تھا۔  دہلی کے لیفٹیننٹ گورنر کی طرف سے دہلی ایکسائز پالیسی 2021-22 کے نفاذ میں مبینہ بے ضابطگیوں کی سی بی آئی انکوائری کی سفارش کے بعد ایکسائز اسکیم کی جانچ پڑتال کی گئی۔  اس معاملے میں لیفٹیننٹ گورنر نے ایکسائز کے 11 افسران کو بھی معطل کر دیا تھا۔  ای ڈی نے اس معاملے میں اے اے پی کے ایم ایل اے درگیش پاٹھک سے اور منی لانڈرنگ کے ایک اور معاملے میں جیل میں بند وزیر ستیندر جین سے پوچھ گچھ کی گئی تھی۔  سی بی آئی نے اس معاملے میں دو لوگوں کو گرفتار کیا ہے۔